Сунтаар Кириэстээҕэр «Алроса» хампаанньа уонна улуус бүддьүөтүн суотугар 120 миэстэлээх, икки мэндиэмэннээх таас оскуола үлэҕэ киириитин үөрүүлээх тэрээһинэ бэҕэһээ, муус устар 1 күнүгэр, ыытылынна.
Кириэстээх улуус кииниттэн 95 килэмиэтирдээх сиргэ сытар. Билиҥҥитэ нэһилиэккэ 800-кэ киһи олорор. Саҥа оскуола тутуутун олохтоохтор туруорсубуттара ыраатта.
2018 сыл күһүнүгэр оскуола бастакы сыбаайата түһэриллэн, нөҥүө сылыгар тутуу матырыйаалын тиэйии-таһыы үлэтэ саҕаламмыта. Тутуу бэдэрээтчитинэн куонкурус түмүгүнэн Владимир Яковлев салайаааччылаах «Форс» ХЭУо талыллыбыта.
Манна биири бэлиэтээн этэр тоҕоостоох. Ол курдук оскуола тутуутугар олохтоох матырыйаалы, өрүс тааһын, кумаҕын туһаннылар диэн улуус дьаһалтатын пресс-сулууспата иһитиннэрдэ.
Оскуола территориятыгар волейбол, баскетбол былаһаакката, сүүрэр сир, оонньуур былаһаакка бааллар.
Улуус дьаһалтатын баһылыга Анатолий Григорьев оскуола аһыллыытыгар Ил Дархан Айсен Николаевка, «АЛРОСА» АК генеральнай дириэктэрэ Сергей Ивановка күүтүүлээх-кэтэһиилээх оскуола тутуллуутугар улахан өйөбүллэрин иһин махталын биллэрдэ.
— Саҥа оскуола толору хааччыллыылаах. Хас хос аайы оҕо үөрэнэр усулуобуйата барыта баар. Бэл диэтэр фекалка, уу таһар массыына кытта бэриллибит. Тутууну «Форс» ХЭУо олус хаачыстыбалаахтык, бары күүһүн ууран туран, үс сыл устата тутан таһаарда. Оскуолаҕа оннооҕор лииптээх. Бу Сунтаарга арааһа, бастакы, Саха сиригэр тарбахха баттанар оскуола быһыылаах… Истиҥ эҕэрдэ! Бу иннинэ учууталлар, үлэһиттэр, үөрэнээччилэр тыбыс-тымныы оскуолаҕа тоҥо, халыҥнык таҥна сылдьыбыт буоллахтарына, билигин учуутал кыргыттар түүппүлэлээх, оҕолор саҥа оскуолаланан үөрэ сылдьалларын көрөн киһи дьоллонор, — диэн улуустааҕы култуура салаатын салайааччыта, суруналыыс Мария Кобельянова санаатын үллэһиннэ.
Үөрүүлээх тэрээһиҥҥэ «АЛРОСА» АК генеральнай дириэктэрин солбуйааччы Алексей Дьячковскай, улуус депутаттарын мунньаҕын бэрэссэдээтэлэ Ульяна Попова, баһылыгы солбуйааччы Гаврил Еремеев, үөрэҕирии управлениетын начаалынньыга Альберт Иванов, олимпийскай призер Александр Иванов, ытык кырдьаҕас Михаил Коколов уонна да атыттар кытыннылар.
edersaas.ru