Уопсастыба

«Кириэстээх” кэпэрэтиип үрүҥ аска сыананы түһэрдэ

Сунтаар улууһугар «Кириэстээх» кэпэрэтиип оҥорон таһаарар үрүҥ аһын сыанатын чэпчэтиилээхтик атыылааһынын саҕалаата.

Үтүө дьыаланы кэпэрэтиип салайааччыта Владимир Егоров бэйэтин көҕүлээһининэн, бастаан былырыын ыам ыйын 21 күнүттэн саҕалаабыта. Быйыл эмиэ, бородууксуйа элбиир кэмигэр уонна саха дьоно төрүт аһыттан тэйээри гынна диэн, маннык үтүө бачыымын олохтоото.

Төһө да ночооту көрүстэрбит, бородууксуйабытын ыам ыйын 21 күнүттэн балаҕан ыйын 20 күнүгэр диэри сайыҥҥы, чэпчэтиллибит сыананан батарыахпыт, — диир Владимир Семенович.

Онон, маҕаһыыннарга билигин кэпэрэтиип астаабыт биир киилэ үүтэ 50 солк., суорат 30 солк. атыыланар буолла, бу иннинэ сыана туһааннааҕынан 65 уонна 55 солк. этэ. Үрүҥ аска сыана чэпчээһинин нэһилиэнньэ барыта биһириир уонна атын хаһаайыстыбалар эмиэ үтүө дьыаланы батыһалларыгар баҕарар.

Сунтаартан Борис НИКОЛАЕВ, Саха сирэ» хаһыат, edersaas.ru сайтка анаан.

1
0

Добавить комментарий