Кыайыы Маны аах

Кириэс Халдьаайыттан Витебскэйгэ диэри тэйиччиттэн сатыы хаамыы бырайыага

Улуу Кыайыы өрөгөйдөөх 76 сылыгар анаан Томпо улууһун Кириэс Халдьаайытыгар үгүс тэрээhин ыытылынна.

Бу туһунан РФ суруналыыстарын сойууһун чилиэнэ, учуутал Ирина Харайданова бу курдук кэпсиир:

— Ыам ыйын 8 күнүгэр «Өйдөбүнньүк чүмэчи» патриотическай аахсыйа Сэбиэскэй Сойуус Дьоруойа Ф.М. Охлопков аатынан музей таhыгар мемориалга ыытылынна. Ыам ыйын 9 күнүгэр Дьоруой Ф.М.Охлопков пааматынньыгар үгэс быһыытынан гирлянда уурулунна. Бу тэрээһини барытын олохтоохтор куйаар ситиминэн көрдүбүт. Тыыл бэтэрээннэрин, сэрии огдооболорун, сэрии кэминээҕи оҕолору дьиэлэринэн сылдьан тэрилтэлэр үрдүк таhымнаахтык эҕэрдэлээтилэр. Маны таhынан, куйаар ситиминэн «Ким да умнуллубат, туох да умнуллубат!» диэн видеоархыыптан оройуоннааҕы Улуу Кыайыыга анаммыт бэстибээли көрдөрбүттэрэ, үгүс киһини долгутта. Таһырдьа сэрии кэминээҕи ырыалар ньиргийдилэр. Куйаар ситиминэн аахсыйа кыттыылаахтарын: Улуу Кыайыыга кынаттаабыт ырыалар — «Тиэргэнинэн ыллыыбыт», «Кыайыы түннүктэрэ» уонна «Георгиевскай лиэнтэ» челлендж олохтоохтору биир санааҕа түмэн, Кыайыыны уhансыбыт дьоммутугар сүгүрүйүү  уонна махтал иэйиитин уматта.
Улуу Кыайыы 76 сылын көрсө «Дьоруой бойобуой суолунан» бырайыак Сэбиэскэй Сойуус Дьоруойа Ф. М. Охлопков аатынан Кириэс Халдьаайы орто оскуолатын иитэр салаа завуhа М.П. Габышева тэрийиитинэн үлэлээтэ. Бу бырайыакка Томпо оройуонун үөрэнээччилэрэ,педагогтара, оройуон тэрилтэтин үлэһиттэрэ, бэтэрээннэрэ бары кыттыыны ыллылар. Аҕа дойду Улуу сэриитигэр хас биирдии кыттыбыт киhи аатын ааттаан туран, кинилэр умнуллубат ааттарыгар сүгүрүйүүбүт бэлиэтэ — төрөөбүт түөлбэбититтэн Кириэс Халдьаайыттан Витебскэй уобалас Шумилино куоратыгар диэри 5813 км хаамыахтаах былааммытын быйыл ыам ыйын 9 күнүгэр толордубут! Бу бырайыак  2019 сылтан саҕаламмыта уонна 2020 сылга пандемия мэһэйдээн 2021сылга түмүктэннэ. Хас биирдии үөрэнээччи өйүгэр-санаатыгар хаалар ситиhии ыам ыйын 9 күнүгэр туолла. Бырайыакка улуус оскуолалара бары хабыллан үлэлэспиттэрэ махталлаах», — диэтэ.

Елена ПОТОЦКАЯ, «Саха сирэ» хаһыат, edersaas.ru

1
0