Киһи дьоҥҥо тардыһар. Хамсык хаайбыт сыллара киһини кэми сыаналыырга, бииргэ буолууну, сомоҕолоһууну чиҥэтэн өйдөппүт, санаппыт эбит диэтэхпинэ, сыыспатым буолуо.
Бу күннэргэ, Култуура үлэһиттэрин күнүгэр анаан, Томпо Кириэс Халдьаайытыгар хамсык кэнниттэн аан бастакы кэнсиэр буолла. Уус-уран самодеятельность диэн тыл умнуллубатах эбит. Бу киэһэ көрөөччү кэтэспит үөрүүтэ уонна кыттааччы долгуйуута бииргэ силлиһэн, хайдах эрэ урукку ааспыт кэми илэ аҕалбыт кэриэтэ буолла. Сыанаҕа улахан, киэҥ экраҥҥа култуура үлэһиттэрин, ааспыт сыллар кэнсиэртэрин хаартыскалара биир-биир тахсан иһэллэрэ сылаас эйгэни олохтоото. Бу светодиоднай экраны 2021 сыллаах бырайыакка кыттан ылбыттара. Маннык экраҥҥа тиксии улахан сыраттан, үлэни, идэни баһылааһынтан тахсар. Биһиги кулууппут улэтэ олохтоохтору үөрдэр, үөрдэ да туруо диэн эрэллээхпит. Сыананы көрдөххө, олох тохтоон хаалбакка өссө күүһүрбүт, эрчимирбит курдук.
Үҥкүүһүттэр чэпчэкилэрэ, ырыаһыттарбыт куоластара эбии аһыллыбыкка дылы, сыанкалартан дьон күлэрэ-салара оонньооччулары эбии тэбиэһирдэн биэрэрэ — туспа ситиһии! Аны көстүүмнэрэ өссө ордук тупсан, сырдаан көстөр эбит. Роман Ефимов, Юрий Кузьмин ырыаларын сэргэ, Даниил Мегинов уонна Дима Заболоцкай оскуола үөрэнээччилэрин көрөөччү дохсун ытыс тыаһынан көрүстэ. «Эллээйик» оҕо народнай ансамблын толоруута уонна улахан дьон сахалыы матыыптаах ырыалара саас кэлбит үөрүүтүн тэҥҥэ үллэстэн кэнсэри ситэрэн-хоторон биэрдилэр.
Култуура күнүгэр култуура үлэһиттэрэ бу курдук көрөөччүлэрин кытта бииргэ буолбуттара өссө долгутта. Саас кэллэ! Сааскы таммах чурулуур-чорулуур тыаһа, чаҕыл күн сардаҥата саас матыыбын сүрэххэ иҥэрбитинэн олохтоох кулууппут үлэһиттэригэр махтал!
Ирина Харайданова,
Томпо, Кириэс Халдьаайы
Хаартыскалар ааптар тиксэриилэрэ