Бу киэһэ социальнай ситимнэргэ: батсаапка уонна фейсбукка Кириһиэнньэ сөтүөтүгэр умсан ылбыт дьон хаартыскаларын ыыталлар, араас көрүдьүөстээх да түгэннэрдээх устуу үгүс.
Елена ПОТОЦКАЯ «Саха сирэ», edersaas.ru
Тымныы полюһугар Өймөкөөҥҥө Кириһиэнньэ күн 54 кыраадыс тымныы буолбут. Ону ол диэбэккэ, сөтүөлээччи ахсаана элбэх эбит. “Кадр” телеустуудьуйа салайааччыта Светлана Поцелуева бэлиэтииринэн, сүрүннээн, эр дьон сөтүөлээбит. Кириһиэнньэ күн улуус киинигэр Уус-Ньараҕа сөтүө быйыл 9-с сылын тэриллэн ыытыллар. Ол эбэтэр, 2008 сыллаахха Индигир өрүскэ “Иордань”-ойбон алларыахтарыттан ыла сыл аайы Таҥара дьиэтин үлэһитэ сөтүө уутун сибэтии гынар.
Оттон: “Үөһээ Бүлүүгэ Кириһиэнньэ күн анал купельга 842 сырытта, 78 киһи сөтүөлээтэ”, — диэн фейсбукка Спиридон Борбуев иһитиннэрдэ.
Нам улууһун “Түбэ” биир дойдулаахтар түмсүүлэрин салайааччыта Григорий Гуляев: “Быйыл күтүөппүн кытта Күөх Хонууга киирэн сөтүөлээтибит. Бастакы сөтүөм сиһим ыарыытын эмтээбитэ. Онтон ыла Кириһиэнньэ сөтүөтүн көтүппэппин уонна тоҥорбуттан куттаммат буолбутум”, — диэн батсаап группатыгар суруйда. Григорий Викторович 2008 сылтан Кириһиэнньэ күн сөтүөлүүр эбит!
Дьэ, ити курдук, Саха сирин тымныытыттан чаҕыйбакка, Кириһиэнньэ сөтүөтүн эттэригэр-хааннарыгар иҥэрэн, үгүс киһи тымныы ууга умсан ылла.
Елена ПОТОЦКАЯ, edersaas.ru
Хаартыска: социальнай ситимтэн.