Өрөспүүбүлүкэ олохтоохторо дистанционнай түөкүттэр угаайыларыгар киирэн биэриилэрэ син биир тахса турар.
Бу күннэргэ 44 саастаах Алдан куорат олохтооҕор баан сулууспатыттан эрийэбин диэн биир киһи төлөпүөннээбит. Итиэннэ кини счетуттан биллибэт дьон харчытын уста сатаабыттарын туһунан иһитиннэрбит. Онон харчытын уордарбатын туһуттан, тута «куттала суох» счекка көһөрөрүгэр сүбэлээбит. Эмсэҕэлээччи сымыйа баан үлэһитигэр эрэнэн, каартатыттан, ону ааһан кирэдьиитинэй каартатыттан харчытын барытын атын счекка көһөттөрбүт. Түмүгэр, 329 870 солкуобайы түөкүттэр счеттарыгар ыыппыт.
«Саха сирин ытыктабыллаах олохтоохторо! Сэрэхтээх буолуҥ! Өйдөөҥ, ыраахтан олорон албынныыр түөкүттэр ханнык баҕарар тэрилтэ үлэһитэ буолбута буолан кубулунуохтарын сөп. «Баан куттал суох буолуутун үлэһиттэрин» кытта кэпсэтэ сатаамаҥ. Түргэнник байар туһунан иһитиннэриигэ итэҕэйимэҥ. Билбэт киһигит ыйыытынан-кэрдиитинэн харчыгытын онно-манна ыытымаҥ. Билбэт сыһыарыыларгытын төлөпүөҥҥүтүгэр да, компьютергытыгар да киллэримэҥ. Харчыгытын билбэт дьоҥҥутугар ыытымаҥ», — диэн СӨ ИДьМ пресс-сулууспата өйдөтөр, сэрэтэр.
edersaas.ru