Кирдээх ууну ыраастыыр ыстаансыйа улуустарга бастакынан Чурапчыга тутулунна

Чурапчы сиригэр-уотугар биир күн иһигэр икки улахан бэлиэ түгэн буолла. Манна тыа сиригэр аан бастакынан федеральнай бырагырааманан тутуллубут фекальнай ууну ыраастыыр ыстаансыйа арылынна уонна “Дом образцового содержания” федеральнай бэлиэ үөрүүлээх быһыыга-майгыга туттарылынна.

Умнуллубат бэлиэ түгэҥҥэ СӨ Ил Дархана Егор Борисов, РФ Коммунальнай хаһаайыстыбатын уларыта тутууга көмөнү оҥорор пуонда судаарыстыбаннай Корпорациятын Кэтээн көрөр сэбиэтин бэрэссэдээтэлэ Сергей Степашин, пуонда генеральнай дириэктэрэ Константин Цицин, Чурапчы улууһун аҕа баһылыга Андрей Ноговицын, уо.д.а. кыттыыны ыллылар.

Тыа сиригэр бастакы хараҥаччылар

Чурапчы сэлиэнньэтигэр 2015 сыллаахха киирбит толору хааччыллыылаах дьиэҕэ “Дом образцового содержания” диэн федеральнай бэлиэ үөрүүлээх быһыыга-майгыга суруллубутун суруйан турабын. Манна эбэн эттэххэ, ыраахтан кэлбит ыалдьыт Сергей Степашин бу үрдүк бэлиэни кытта “Знак качества ЖКХ” истиэнэҕэ ыйанар табылыыссалары дохсун ытыс тыаһыгар доҕуһуоллатан элбэх кыбартыыралаах дьиэлэри көрөр-истэр “Хатан” ХЭУо дириэктэригэр Владимир Сивцевкэ туттарда.

Биир умнуллубат улахан бэлиэ түгэнинэн, фекальнай ууну ыраастыыр ыстаансыйа арыллыыта буолла. Бу өрөспүүбүлүкэ улуустарыгар эмиэ бастакынан киирдэ.

Ыстаансыйа Чурапчы сэлиэнньэтин уонна Сылаҥ нэһилиэгин икки ардыгар сытар Хабыйахаан алааһыгар баар.

Чурапчы улууһун баһылыга Андрей Ноговицын нэһилиэнньэ кэҥээн, дьиэни-уоту тутуу элбээн иһэрин бэлиэтиир. Улуус уопсайа 21 тыһыынча нэһилиэнньэлээх буоллаҕына, уонтан тахса тыһыынчата кииҥҥэ олорор. Онон маннык ыстаансыйаны тутуу олох ирдэбилэ буоларын этэр.

Кыһалҕаны эрдэттэн быһаарар боппуруос чэрчитинэн, 62 мөл.солк. суумалаах фекальнай ууну ыраастыыр ыстаансыйа федеральнай үбүлээһин уонна өрөспүүбүлүкэ, улуус көмөтүнэн тутуллубут. Бэлиэтээн эппиттэринэн, ыстаансыйа күҥҥэ 500 куб кирдээх ууну ыраастыыр кыамталаах.

—Уон тыһыынчаттан тахса нэһилиэнньэлээх сэлиэнньэҕэ бу ыстаансыйа тутуллубута наадалаах, туһалаах.  Маныаха тыа сиригэр саҥа ньыманан толору хааччыллыылаах тутуулары киллэрии үлэтэ күүһүрэн иһэр, — диэтэ Ил Дархан. Пуонда өйөбүлүнэн өрөспүүбүлүкэҕэ хаарбах дьиэлэртэн көһөрүү бырагыраамата олоххо киирбитин, онон дьоҥҥо-сэргэҕэ судаарыстыбаттан улахан өйөбүл оҥоһулларын эттэ.

Сергей Степашин Чурапчыттан Олимпиада чөмпүйүөннэрэ, ытык суруйааччылар, Социалистическай үлэ бастакы Дьоруойа үүнэн-сайдан тахсыбыттарын сөҕөн-махтайан, үөрэн туран бэлиэтээтэ. Саха сирин кытары ыкса үлэлэһэллэрин эттэ. Тыа сирин дьоно-сэргэтэ табыгастаах усулуобуйаланаллара саамай сөптөөҕүн ыйда.

Үөрүүлээх бэлиэ түгэҥҥэ алгысчыт аал уоту отунна, алгыс баһын сыалаата. Чурапчы дьоно-сэргэтэ көхтөөхтүк кытынна, үөрүүнү үксэтистэ.

* * *

Маннык ыстаансыйа тутуллуута – олох ирдэбилэ. Онон кыһалҕалаах боппуруоһу эрдэттэн быһаарар инниттэн, улуустан хас да эппиэттээх киһи сыл аҥарын инниттэн тыа сиригэр майгылыыр олохтоох-дьаһахтаах регионнарга тиийэн сиһилии көрбүттэр-истибиттэр, үөрэппиттэр.

Ол кэннэ манна, бэйэлэригэр, тутууга ылсыбыттар. Балачча обургу тутуу иһигэр хас да улахан бассейннаах.  Быһаарбыттарынан, уу носуоһунан куттарыллар, уон араас ньыманан ыраастаныллар. Бу уу күн аайы бэрэбиэркэлэниллэр. Ыйга биирдэ Дьокуускайга Роспотребнадзор бэрэбиэркэтин барыахтаах.Матырыйаалларын Улан Үдэттэн, Санкт-Петербуртан, Новосибирскайтан аҕалбыттар.

Ыраастаныллыбыт тэхиньиичэскэй уу турба устун баран, алааска кутуллан күөл буолар. Мантан иһэр, муус ылар көҥүллэммэт. Ол эрээри, ыраастаныллыбыт аата ыраастаныллыбыт. Тулалыыр айылҕа киртийбэт диэн бигэргэтэллэр.

Ыстаансыйа үлэтин сөбүлээтэхтэринэ, көҥүл бэрилиннэҕинэ, чурапчылар эһиилгиттэн атын улуустарга маннык тутуу саҕаланыан сөп диэн үөрэллэр.

Сардаана БАСНАЕВА, «Саха сирэ» хаһыат, edersaas.ru  

Мария ВАСИЛЬЕВА (СИА) хаартыскаларга түһэриитэ.