Тымныы полюһа Өймөкөөн улууһун Төрүт нэһилиэгэр В.И. Ленин төрөөбүт күнүгэр Саха сирин хомсомуолун 100 сылыгар анаммыт тэрээһиҥҥэ икки эйэлээх дьиэ кэргэн тапталларын сылааһыттан, бэл, дьаһалта дьиэтэ кытта сырдаата.
Ол курдук, 1967-1969 сылларга хомсомуол сэкирэтээринэн үлэлээбит Семен Семенович Егоров кэргэнинээн Акулина Кононовналыын 82 саастаахтар. Кинилэр Төрүккэ олунньу 3 күнүгэр 1963 сыллаахха бастакы комсомольскай сыбаайбаны тэрийбиттэрэ. Ол тэрээһин күн бүгүҥҥэ диэри төрүттэргэ холобурга сылдьар. Икки сылынан Егоровтар бииргэ олорбуттара 60 сылын туолар. Бу ханна барытыгар сиэттиспитинэн сылдьар сис ыал — Төрүт нэһилиэгин киэн туттуута.
Оттон Николай уонна Раиса Захаровтар Саха сирин хомсомуолун 100 сыллаах чиэстээһиҥҥэ кэриэс гына уура сылдьар докумуоннарын аҕалбыттара бэрт сонуннук көһүннэ. Ол курдук, Николай Николаевич комсомольскай билиэтин көхтөөх үлэтин иһин үйэ саас тухары кэриэс гына сылдьарыгар биэрбиттэрин уура сылдьар эбит. Ол хаартыскатын тапталлаах кэргэнэ Раиса Ивановна сэбиэскэй кыргыттар тапталлаахтарын хаартыскатын медальон гына уурунар үгэстэринэн кэриэс гына сылдьарын аҕалан көрдөрбүтэ — Захаровтар урукку эдэр дьоллоох кэмнэрин бэлиэтэ. Николай Захарович Бүлүү улууһуттан төрүттээх. Кини Өймөкөөн Төрүтүн кэрэ кыыһын таптаан, ыал буолан олохсуйан, Төрүккэ — мааны күтүөт.
Бүгүн В.И. Ленин төрөөбүт күнэ дьоллоох дьиэ кэргэттэргэ Егоровтарга уонна Захаровтарга кэрэ эдэр саастарын санатта…
Елена ПОТОЦКАЯ.