Кинилэргэ күн бүгүҥҥэ диэри махтаналлар

Бөлөххө киир:

Мин доруобуйа харыстабылыгар мэдиссиинискэй сиэстэрэнэн 45 сыл үлэлээтим. Үлэбин 1963 сылтан Уус Алдантан саҕалаан баран, Дьокуускайга көһөн кэлбитим. Бастаан Өрөспүүбүлүкэтээҕи балыыһа неврологияҕа отделениетыгар балаата сиэстэрэтинэн үлэҕэ киирбитим. Манна хас да сыл үлэлээн баран, искэни эмтиир өрөспүүбүлүкэтээҕи диспансерга көспүтүм.

edersaas.ru

Миигин диспансерга эндоскопия кэбиниэтигэр ыстаапка аҥаарыгар ыстаарсай мэдиссиинискэй сиэстэрэнэн ылбыттара. Кылаабынай бырааһынан РСФСР үтүөлээх бырааһа Иван Иванович Местников, поликлиника сэбиэдиссэйинэн үрдүк категориялаах быраас Иннокентий Николаевич Никифоров, эндоскопист-бырааһынан РСФСР үтүөлээх бырааһа Виктор Григорьевич Алексеев үлэлииллэрэ. Үлэбит олус элбэҕэ — эндоскопияҕа чинчийиилэри, цистокопияны оҥорорбут, цитологическай чинчийиигэ анаалыстары ыларбыт. Оччолорго тупсаҕай усулуобуйа суоҕа – ууну бэйэбит таһарбыт, илиибитин тааска суунарбыт.

ОТУТ СЫЛ — ДИСПАНСЕРГА

-Диспансерга 30 сыл үлэлээбитим. Бэйэм идэбинэн олус киэн туттабын. Бу сыллар тухары үтүө санаалаах быраастары уонна сиэстэрэлэри кытары үлэлээбитим. Биһигини барыбытын уопсай үлэбит ситимниирэ, бары биир хамаанданан үлэлиирбит.

Диспансер хас да куорпустааҕа үлэһиттэргэ уонна ыарыһахтарга ыарахаттардаах этэ. Ууну биэдэрэнэн таһыы, үнүстүрүмүөннэри уонна испириистэри сууйарга-соторго ыарахаттары үөскэтэрэ. Мин эндоскопия кэбиниэтигэр быраас Виктор Алексеевы кытары үлэлээбитим. Виктор Григорьевич миигин салайара, ыксаабакка, холкутук саҥарара, эндоскопия тэриллэринэн хайдах үлэлиирбин быһааран биэрэрэ. Онон, диспансерга бииргэ үлэлээбит маҥнайгы бырааспар олус махтанабын.

Таһыттан сылдьар ыарыһахтарга химиотерапия кэбиниэтин арыйбыттарыгар, процедура сиэстэрэтинэн кэлбитим. Игорь Селивановы кытары үлэлээбитим. Эбиэккэ диэри процедуралары оҥорорум, эбиэт кэннэ ыарыһахтары көрөрбүт. Үлэлээбитим үһүс сылыгар бырааһым Игорь Леонидович эмискэ орто дойдуттан туораан, барыбытын аймаабыта. Мин кылгас да кэмҥэ кини курдук үөрэхтээх, туйгун исписэлиис, үтүө киһини кытары үлэлээбиппинэн дьоллоохпун. Онтон миигин УЗИ кэбиниэтигэр мэдиссиинискэй сиэстэрэнэн көһөрбүттэригэр, киэҥ билиилээх быраастар Геннадий Георгиевич Лобановы, Петр Степанович Илларионовы, УЗИ-быраастара Андрей Доржиевич Замураевы, Андрей Васильевич Максимовы уонна оччолорго эдэркээн быраастар Людмила Романовна Охлопкованы, Юрий Алексеевич Николаевы кытары үлэлээбитим. Кинилэр оччолорго үлэлэрин саҥа саҕалаабыттара уонна билигин диспансерга ситиһиилээхтик үлэлии сылдьаллар.

СВЕТЛАНА ГОГОЛЕВАНЫ ТУТА СӨБҮЛЭЭБИППИТ

Тоҕус сылынан поликлиникаҕа маммология кэбиниэтин сиэстэрэтинэн кэлбитим. Бу кэмҥэ бырааһынан Зинаида Дмитриевна Гурьева, кылаабынай мэдиссиинискэй сиэстэрэлэринэн Раиса Павловна, Вера Георгиевна, Христина Владимировна үтүө суобастаахтык үлэлии сылдьаллара. 2002 сылтан мэдиссиинискэй сиэстэрэлэри кылаабынай сиэстэрэ Светлана Гоголева салайар. Эдэркээн Светлана Алексеевна химиотерапия отделениетыттан кэлбитэ. Биһиги кинини ирдэбилин, биһиэхэ убаастабыллаах сыһыанын, өйөбүлүн уонна кырдьыктаах сэмэтин, сүбэтин-аматын иһин сөбүлээбиппит. Светлана Алексеевна миигин үлэҕэ да, ыарахан да кэмнэрбэр мэлдьи өйүүрэ. Сиэстэрэм үлэтигэр эбээһинэстээх уонна билиилээх буолары ирдиирэ. Үлэбит ис-иһигэр киирэн, элбэҕи быһаарара.

Мин кэбиниэккэ үлэлээн, күҥҥэ хаста даҕаны матырыйааллары анаалыстарга аҕаларым. Лаборатория санитарката Мотрена Яковлевна Чертовскиҕы кытары ыкса дьүөгэлэспитим. Кини хаһан да таах олорбото, наар сууйан-сотон тахсара, халааттары, халпаактары өтүүктүүрэ, үлэтигэр олус бэриниилээҕэ.

Диспансер кэлэктиибэ олус иллээх-эйэлээх этэ. Элбэхтик субуотунньуктары тэрийэрбит, дьиэбит таһын хомуйарбыт. Норуот дружинатыгар сылдьарбыт, дьуһуу-рустубалыырбыт, нус-хас олоҕо суох дьиэ кэргэттэргэ сылдьарбыт. От кэмигэр “Хатас” соп¬хуоска, оттон күһүн хомуур үлэтигэр ыыталлара. Былааммытын мэлдьи толорорбут. Төһө да ыарахаттар баалларын иһин, бары эйэлээхтик, бэһиэлэйдик үлэлиирбит, бииргэ чэйдиирбит, хонууга эбиэппитин буһарынарбыт.

ДЬЫЛҔАБАР МАХТАНАБЫН

— Мин онкология сулууспатын төрүттээччилэртэн биирдэстэрэ, 1957-1970 сылларга диспансер кылаабынай бырааһынан үлэлээбит, Аҕа дойду Улуу сэриитин кыттыылааҕа, 1941 сылтан хомуньуус Виталий Поповтуун үлэлиир дьол тосхойбутугар дьылҕабар олус махтанабын. Виталий Иннокентьевич мин үлэм бастакы күннэригэр ССКП баартыйа тэрилтэтигэр учуокка ылбыта. Кинини кытары поликлиникаҕа мэдиссиинискэй сиэстэрэ Тамара Пантелеймоновна Зедгенидзева үлэлээбитэ. Иккиэн дьоһуннаах саастарыгар сылдьаллара. Виталий Иннокентьевич мин өйбөр-санаабар толоос быһыы-майгы диэни билбэт, кэпсэтинньэҥ киһинэн хаалбыт. Кини наар истиҥ мичээрдээх кэпсэтэрэ, үтүө дууһалааҕа, үрдүк култууралааҕа уонна дириҥ билиилээҕэ. Үгүс сыллаах үөрүйэҕин биир идэлээхтэрин кытары үөрэ-көтө үллэстэрэ. Виктор Григорьевич командировкаҕа сырыттаҕына, үрдүк категориялаах быраас, өрөспүүбүлүкэҕэ цитология лабораториятын төрүттээчи, үлэтигэр олус эппиэтинэстээх, аҕыйах саҥалаах, үрдүк култууралаах Павел Степанович Герасимов солбуйара. Кини аппарааттары чэнчистик тутан үлэлиирэ, оттон мин сиэстэрэм үлэтин Виктор Григорьевич үөрэппитин курдук толорорум.

БИҺИГИТТЭН ӨРӨСПҮҮБҮЛҮКЭ САЛАЙААЧЧЫЛАРА ҮҮММҮТТЭРЭ

1986-2004 сылларга диспансер кылаабынай бырааһынан Розалия Иванова үлэлээбитэ. Кини баартыйа тэрилтэтин сэкирэтээрэ уонна талааннаах тэрийээччи буолан, барыбытын түмэрэ. Мин үлэлээбит сылларым кини диспансеры сала¬йар кэмигэр ааспыттара. Билигин Розалия Ильиничнаны дириҥ ытыктабылынан ахтабын. Кини Анна Алексеевна Домашенкина сэбиэдиссэйдээх химиотерапия уонна Люция Спиридоновна Ларионова сэбиэдиссэйдээх гинекология курдук икки саҥа отделениены арыйбыта. Ити сылларга гинеколог-хирурунан СӨ үтүөлээх бырааһа, өрөспүүбүлүкэ ыстааты таһынан кылаабынай онколога Лина Саввична Колесова үлэлиирэ. Сайаҕас санаалаах, көрсүө-сэмэй, үрдүк култууралаах гинеколог-быраас Анна Григорьевна Любимованы ыарыһахтар күн бүгүҥҥэ диэри үтүөнэн эрэ ахталлар.

Онкология сулууспатыттан өрөспүүбүлүкэ бэртээхэй салайааччылара тахсыбыттара. САССР доруобуйатын харыстабылын идэлээх сойууһун обкомун бэрэссэдээтэлэ Евдокия Пантелеймоновна Иванова онкология диспансерыгар радиология отделениетын сэбиэдиссэйинэн, Иван Иванович Местников диспансер кылаабынай бырааһынан, САССР доруобуйатын харыстабылын миниистиринэн үлэлээбиттэрэ, Юрий Павлович Степанов хирурдаабыта, билигин — Аҕа дойду Улуу сэриитин уонна үлэ бэтэрээннэрин, инбэлииттэр доруобуйаларын чөлүгэр түһэрэр киин дириэктэрэ, РФ үтүөлээх бырааһа, мэдиссиинискэй наука дуоктара.

Кэлэктиип бэйэтин быраастарынан киэн туттар. Быраастарбыт ханна да үлэлээбиттэрин иһин, биһиги кинилэри “биһиги дьоммут” диэн ааттыыбыт.

«Саха сирэ» хаһыакка, edersaas.ru саайтка анаан

доруобуйа харыстабылын бэтэрээнэ

Александра ФЕДОРОВА.

Хаартыскалар — ааптар архыыбыттан.

+1
0
+1
0
+1
0
+1
0
+1
0
+1
0
+1
0