Уопсастыба

Үөһээ Бүлүүгэ кинигэлэр иккистээн «күн сирин көрдүлэр»

Бу күннэргэ Үөһээ Бүлүү улуһун типографията  40-тан тахса сыллааҕыта тахсыбыт кинигэлэри саҥа технологиянан иккистээн саҥардан  бэчээттээн таһаарда.

edersaas.ru

Кинигэлэр ааптардара — Аҕа дойду Улуу сэриитин кыттыылааҕа, педагогическай үлэ бэтэрээнэ Александр Николаев. Саҥардыллан бэчээттэммит кинигэлэр тустарынан бэйиэт-учуутал кыыһа Мария Николаева бу курдук кэпсиир:

— Айар куттаах учуутал эдэр сааhыттан суруйарга, тылбаастыырга холонор эбит.  Бүлүүтээҕи педтехникумҥа үлэлии сылдьан, литература куруһуогун салайбыт.  Онно кини үгүс устудьуону айар үлэ алыбар уһуйбут.

Александр Николаев Аҕа дойду Улуу сэриитигэр 1941  сыллаахха ыҥырыллан, Волховскай фроҥҥа тиийбит. Онно кинини 11 дивизия 163 стрелковай полкаҕа минометчигынан анаабыттар. Хорсуннук сэриилэспит буойун  дойдутугар 1943 сыллаахха эргиллэн кэлэн, Үөһээ Бүлүү оскуолатыгар дириэктэринэн, завуһунан, учууталынан үлэлээбит. Айар үлэ абылаҥар ылларбыт киhи хоhоон суруйарын, тылбаастыырын бырахпат эбит. Үлэлэрэ оройуон, өрөспүүбүлүкэ хаhыаттарыгар, сурунаалларыгар бэчээттэммиттэрэ.

1967 сыллаахха И. А. Крылов үгэлэрин тылбаастаан, туспа хомуурунньук оҥорон бэчээттэтэр. Онтон М. Ю. Лермонтов «Ашик-кериб» (1965 с.), С. Михалков «Дьээдьэ Степа» (1975 с.) айымньыларын тылбааһа кыраачааннарга күндү бэлэҕинэн буолбут.  1976 сыллаахха кэргэнэ Александра Ионовна учуутал хоһооннорун хомуйан, «Дорообо, добун халлаан»  уонна «Тыытымаҥ чыычаах уйатын» кинигэлэри бэчээккэ бэлэмнээн таһаарбыт. 

 

Бу саҥа тахсыбыт кинигэлэри оҕолор олуһун сөбүлээтилэр.  Кылаас таһынан ааҕыыларга көрдүлэр-иһиттилэр.

Кэлиҥҥи кэмҥэ улуус типографията саҥа технологияны туhанан кинигэ, брошюра, фотоальбом арааһын бэчээттээн таһаарар буолла. Онон өрөспүүбүлүкэбит уонна олохтоох суруйааччылар, бэйиэттэр кинигэлэрэ бу курдук салгыы тахсалларыгар улуус салалтата улахан болҕомтотун уурарыгар эрэнэбит.

 

Үүнэр көлүөнэни иитиигэ туһуламмыт кинигэлэр Ийэ дойдуга бэриниилээх буолуу сылыгар саҥаттан эбии бэчээттэнэн, күн сирин көрбүттэриттэн ордук оҕолорго күндү бэлэх суох.

Елена ПОТОЦКАЯ, «Саха сирэ» хаһыат, edersaas.ru

0
0
Telegram @edersaas20

Добавить комментарий