Култуура Маны аах

«Кинигэ күүһэ» өрөспүүбүлүкэтээҕи аахсыйа үһүс төгүлүн ыытылынна

Бүтүн Арассыыйатааҕы бибилитиэкэ күнүгэр Саха сиринээҕи национальнай бибилитиэкэ «Кинигэ күүһэ» аахсыйаны үһүс төгүлүн тэрийэн ыытта.

Аахсыйа сиэринэн доҥҥо-сэргэҕэ биллэр киһи сөбүлээн ааҕар кинигэтин туһунан кэпсиэхтээх, истээччилэргэ кинигэттэн быһа тардан доргуччу ааҕыахтаах. Пандемиянан сибээстээн, тэрээһин Дьокуускайдааҕы национальнай бибилитиэкэ Зуум сигэтинэн, Инстаграм уонна Ютуб ханаалын быһа эпииринэн буолан ааста.

Быйылгы аахсыйа бүгүҥҥү Бибилитиэкэ күнүгэр, ону тэҥэ 2021 сылга биллэриллибит Наука уонна технология сылыгар ананна. Оттон үтүө үгэс буолбут «Кинигэ күүһэ» аахсыйа бүгүҥҥү ыалдьытынан «Якутия технопаарка» биотехнологияҕа лабораториятын сүрүннүүр эспиэрэ, «Ксенос» ХЭТ генеральнай дириэктэрэ Евгений Попов буолла.

Евгений Попов олус интэриэһинэй уонна туһалаах чинчийэр үлэнэн дьарыктанар. Ол курдук Саха сиригэр үөскүүр клещтэри үөрэтэр, ону тэҥэ полистиролу сиир хомурдуостары чинчийэр. Чинчийии хаамыытынан пластик сорох көрүҥүн, ол эбэтэр полистиролу (пенопласт, сылааһы тутар полистирол, доширак хоруопката) сиир хомурдуос түөрт көрүҥэ баарын кылгастык кэпсээтэ.

Хомурдуостар полистиролу сиэтэхтэринэ, куртахтарын-оһоҕосторун иһинэн тулалыыр эйгэҕэ буортута суох оҥорон таһааралларын социальнай ситим нөҥүө көрөөччүлэргэ сырдатта.

Евгений Попов Чехия фантаст-суруйааччыта Ян Вайсс кинигэтиттэн «Нам было его жаль…» диэн кэпсээни ааҕан иһитиннэрдэ. Салгыы көрөөччүлэр ыйытыыларыгар эппиэттээтэ. Тэрээһини сиһилии бу сигэнэн киирэн көр.

Бүгүҥҥү «Кинигэ күүһэ» аахсыйа бүтүн өрөспүүбүлүкэ үрдүнэн ыытылла турар. Бүгүн биллэр дьон, чинчийээччилэр, учууталлар аахсыйаҕа кыттыһан «Зуум» платформатынан оскуола оҕолоругар бэйэлэрин сөбүлүүр кинигэлэрин доргуччу ааҕан иһитиннэрэллэр.

Хаартыска Национальнай бибилитиэкэ сайтыттан ылылынна.

1
0