Сэтинньи 5– 6 күннэригэр Ашхабадка «Кинигэ – бииргэ үлэлэһэргэ уонна сайдыыга сирдиир суол» диэн Аан дойдутааҕы ХIII кинигэ быыстапка-дьаарбаҥкатыгар кыттан кэллибит. Бу улахан кинигэ түһүлгэтигэр барыта 16 араас судаарыстыба, ол иһигэр Австрия, Корея, Польша, АХШ, Азербайджан, Беларусь, Иран, Казахстан, Кытай, Кыргызстан, Россия, Турция, Украина, Франция, Молдова уонна Пакистан бэрэстэбиитэллэрэ бааллар.
edersaas.ru
Бу далааһыннаах тэрээһиҥҥэ кинигэ эрэ буолбакка, бэчээт индустриятын уонна полиграфия искусствотын саҥа ситиһиилэрин билсиэххэ сөп. Манна даҕатан, дириҥник ытыктанар Туркменистан бэрэсидьиэнэ Гурбангулы Бердымухамедов тус оруолун бэлиэтиэххэ сөп. Кини 50-ча кинигэ ааптара, ол иһигэр «Независимый, постоянно нейтральный Туркменистан», «Поклонение матери– преклонение перед святыней», Дьөһөгөй таҥаралаах туркмен омук буоларынан, «Ахалтекинские кони – наша гордость и слава», «Стремительная поступь скакуна», «Конь — символ верности и счастья» диэн туркмен атын туһунан кинигэлэрдээх, «Эмтээх үүнээйилэр» диэн 11 томнаах энциклопедиялаах. Бу тэрээһиҥҥэ туркменнар алабай боруода ыттарын, Орто Азия овчаркатын, туһунан үс тылынан тахсыбыт кинигэтэ сүрэхтэннэ.
Бу дьаарбаҥка чэрчитинэн улахан далааһыннаах научнай конференция буолла. Онно Казахстан Республикатыттан академик, Евразия норуоттарын литератураларын сүбэтин хос бэрэссэдээтэлэ Бахитхожа Рустемов уот харахха «Построен золотой мост между народами» диэн эппитин мустубут дьон-сэргэ бары долгуйа иһиттибит. Кырдьык даҕаны, киһи киһилиин, омук омуктуун алтыһарыгар, уопут атастаһарыгар туох баар усулуобуйа барыта тэриллибит. Кинигэ биир сүдү суолтата онно сытар эбит – араас иитиилээх, араас итэҕэллээх дьону түмэр, эйэлээхтик олорорго, алтыһарга, бииргэ үлэлэһэргэ ыҥырар. Ким билиэй, Туркмения бэрэсидьиэнэ Гурбангулы Бердымухамедов, баҕар, бу атааннаах-мөҥүөннээх Орто дойдуга кэлбит сүрүн миссията ол буолуо…Хас кэлбит дэлэгээссийэ айанын бэйэтэ төлүү-төлүү, маннык ороскуоттаах тэрээһини уйунарын уонна киһи хайдах атыннык быһаарыа эбитэ буолла?..
Икки күн буолбут тэрээһиҥҥэ кинигэ сүрэхтэниилэрэ, суруйааччылардыын уонна бэйиэттэрдиин көрсүһүүлэр, тылбаасчыттар санаа атастаһыылара, худуоһунньуктар сэминээрдэрэ быыстала суох тэриллэн кинигэ улахан түһүлгэтэ уоттаахтык-күөстээхтик үлэлии турарын көрүөххэ сүрдээх үчүгэй.
Биһиги тус бэйэбит Корея Республикатын бэрэстэбиитэлин тойон Чжон Бонсуну кытта кэпсэппиппит, Азия культуратын киинин иһинэн кинилэр Азия остуоруйаларын нууччалыытын бэйэлэрэ иллюстрациялаан бэчээттииллэр эбит. Холобур, бу ааспыт ыйга туркмен омук «Каждый хорош на своем месте» диэн остуоруйатын кинигэ оҥорон таһаарбыттарын илдьэ кэлбиттэр. Сахалыы да остуоруйаны таһаарарга бэлэмнэр.
Биир бэйэм Молдова издательствотын оҕоҕо анаан таһаарбыт кинигэлэрин сэргии көрдүм: киһи кэллиэгэлэриттэн үөрэнэрэ элбэх.
Биһиги «Бичикпит» кинигэлэрэ тас дойдулар таһаарыыларыттан харыс да хаалсыбаттар эбит диэн сыана быһынныбыт. Сороҕо өссө ордук эбит диэн киэн тутта көрдүбүт. Салайааччыларбытыгар Август Васильевичка, Валерий Николаевичка үгүс доҕотторуттан – аан дойду издателлэриттэн итии төлөннөөх эҕэрдэлэрин илдьэ кэллибит.
Людмила Баишева — Федорова, » Бичик» уус- уран литературатыгар редакцията