Уус Алдан тыатын хаһаайыстыбатын туһунан кинигэ Арассыыйатааҕы куонкуруска иккис миэстэ буолла
Бу күннэргэ Карелия өрөспүүбүлүкэтин Петрозаводск куоратыгар «Библиотекалар кыраайы үөрэтэр салааларын кыһалҕалара» XXI бүтүн Арассыыйатааҕы научнай-практическай сэминээр ыытыллар. Бу сэминээр чэрчитинэн “Авторский знак” I Бүтүн Арассыыйатааҕы бибилэтиэкэлэр кыраайы үөрэтэр таһаарыыларыгар куонкурус ыытылынна.
Куонкуруска алта уон биэс эрэгийиэнтэн уопсайа 242 үлэ киирбититтэн, 88 үлэни иккис түһүмэххэ аһардыбыттар. Онтон салгыы анал хамыыһыйа үөрэтэн ааҕан, 36 кинигэни финалга киллэрбит. Алта номинациянан кыайыылаахтары быһаарбыттар.
«Научно-справочные издания» диэн салааҕа “Уус Алдан улууһун тыатын хаһаайыстыбата: ааспыт уонна билиҥҥи кэм” кинигэ иккис миэстэҕэ тигистэ.
Бу кинигэ ааптардарынан үлэ бэтэрээнэ, тыа хаһаайыстыбатын бэтэрээнэ Надежда Федотова уонна С.С.Васильев-Борогонскай аатынан улуус киин бибилэтиэкэтин информационнай уонна методическэй киинин сэбиэдиссэйэ Февронья Федорова буолаллар.
Ааптар Надежда Федотова:
— Февронья Гаврильевналыын бу кинигэни сэттэ сыл устата суруйдубут. Олус элбэх архыыбы, дааннайдары, отчуоттары ырыттыбыт, аахтыбыт. Бу куонкуруска сайаапканы пандемия саҕаланыан иннинэ ыыппыппыт. Хамыыһыйа сэттэ ый устата үлэлээбит эбит. Күүстээх үлэлэр быыстарыгар киирбиппититтэн үөрэн сылдьабыт.
Санатан этэр буоллахха, бу кинигэ былырыын ыытыллыбыт 20-c «Көмүс күһүн» Бүтүн Арассыыйатааҕы агропромышленнай быыстапкаҕа кыһыл көмүс мэтээлинэн наҕараадаламмыта.
Виктория Бястинова, «Саха сирэ» хаһыат, edersaas.ru