Саха сиригэр Арассыыйа кинигэ таһаарааччыларын ассоциациятын бэрэсидьиэнэ ыалдьыттаата
Саха сиригэр төрөөбүт тыл, сурук-бичик күнүгэр Арассыыйа кинигэ таһаарааччыларын ассоциациятын бэрэсидьиэнэ Константин Чеченев ыалдьыттаата. Кини, “Бичик” кинигэ кыһатын ыҥырыытынан, “Национально-культурное своеобразие языков коренных народов Якутии” диэн конференцияҕа кытынна. Ыалдьыппыт маннык кэпсээннээх:
— Бу бэлиэ күҥҥэ кыттыбыппыттан олус үөрдүм. Маныаха конференцияҕа кыттан, Саха сиригэр кинигэни бэчээттээн таһаарыы кыһалҕаларын ырыттыбыт, өрөспүүбүлүкэ былааһын кытта кэпсэтэн саҥа былааннары торумнаатыбыт. Саха сиригэр үһүс кэлиим буолар.
— Арассыыйаҕа кинигэ таһаарыытыгар туох кыһалҕалар баалларый?
— Дьон кинигэни ааҕара аччаата, кинигэни таһаарааччыларга эмиэ мэһэйдэри үөскэтэр. Бу уопсай грамматикаҕа болҕомто суоҕуттан тахсар быһыы-майгы буолла. Маныаха араас социологическай ыйытыктары оҥорбуттара. Ол иһин, былырыын РФ бырабыыталыстыбата оҕо ааҕыытын өйөөһүн туһунан бырагыраама таһаарбыта. Конференцияҕа бу тула кэпсэттибит, оҕо ааҕыытыгар, ааҕар буолууга былаас өттүттэн болҕомто ууруллуохтаах. Маны таһынан, кинигэ маҕаһыыннарыгар арыандаҕа туох даҕаны чэпчэтии көрүллүбэт, бу эмиэ биир тирээн турар улахан кыһалҕа.
— Оттон электроннай кинигэҕэ көһүүнү туох дии саныыгын?
— Аан дойдуга баар быраактыка көрдөрбүтүнүн, дьон кумааҕы даҕаны, электроннай даҕаны кинигэлэргэ наадыйар эбит. Этэргэ дылы, биирэ атыныгар мэһэйдээбэт. Холобурдаан эттэххэ, научнай литератураны дьон электроннай барыйаанын ордорор, оттон оҕоҕо кумааҕы кинигэни атыылаһар. Кинигэни олоҕун ханнык өрүтүгэр туттаргыттан тутулуктаах. Бу ханнык дойдуга олороргуттан тутулуга суох дии саныыбын. Онон, дьон ааҕара аччаабыта электроннай кинигэлэр баалларыттан диэн сыыһа өйдөбүл.
— “Бичик” кинигэ кыһатын үлэтин хайдах сыаналыыгыный?
— Былырыын, “Бичиккэ” 340 тыһ. экземпляр кинигэ бэчээттэммит. Бу аҥарадас Саха сиригэр баар 22 кинигэ кыһата бэчээттиир кинигэлэрин улахан аҥаара буолар. Өссө хас даҕаны тылынан кинигэни бэчээттииллэр, бу маны мин олус биһириибин. “Бичик” Уһук Илиҥҥэ бастыҥ үлэһиттэрдээх, үрдүк таһымнаах кинигэ кыһатынан биллэр.
Айтана Аммосова, edersaas.ru