Кини кинигэлэрэ атын омук тылыгар тылбаастаналлар

Бөлөххө киир:

Бүгүн, Култуура үлэһиттэрин күнүгэр, Арассыыйа Суруналыыстарын, Саха сирин суруйааччыларын сойуустарын чилиэнэ, оҕо кинигэлэрин ааптара Евдокия Семеновна Иринцеева-Огдо үбүлүөйдээх сааһын бэлиэтиир.

edersaas.ru

Евдокия Иринцеева-Огдо Кэбээйи улууһун Тыайа сэлиэнньэтигэр төрөөбүтэ. М.К.Аммосов аатынан Саха судаарыстыбаннай университетын омук тылын факультетын бүтэрбитэ.
Кини — 2008 с. литература өрөспүүбүлүкэтээҕи сабыылаах куонкуруһун 3 номинациятын кыайыылааҕа. Ааҕааччылар сэҥээриилэрин уонна биһирэбиллэрин ордук «Барыта алҕас этэ», «Санатыма дуу, ааспыты…», «Буолар да эбит…» кинигэлэрэ ылбыттара. Норуот эмчитэ Дора Кобяковаҕа-Эдьиий Дораҕа анаабыт «Эдьиий» диэн кинигэтигэр элбэх дьон дьылҕатын киллэрбитэ.
«Мэник Сэлиичээн» остуоруйата нуучча уонна англия тылларыгар, «Санатыма дуу ааспыты» сэһэнэ нууччалыы уонна буряттыы тылбаастаммыттара. Стокгольм куоракка ыытыллыбыт  “Аһаҕас Евразия-2017” VI норуоттар икки ардыларынааҕы литературнай бэстибээл кэмигэр, английскайдыы тылынан тахсыбыт “Мамонтенок Мэник” кинигэтин биһирэмнээн кэлбитэ.


«Санатыма дуу, ааспыты» кинигэ туһунан Бурятия бэйиэтэ, филология наукатын хандьытаата Оксана Дареева:
«Бу сэһэн эйгэтэ миигин оҕо сааһым кыһалҕата суох күннэригэр төнүннэрдэ. Сэһэн дьоруойа Аанчык  үтүө санаалаах, элэккэй кыыс. Кини дьиҥнээхтии ис сүрэҕиттэн таптыыр, мин, бэл, ытаатым. Билигин ардыгар Индия киинэлэрин санатар айымньылар аҕыйахтар. Тылбааһа олус үчүгэй, идэлээх тылбаасчыт  Надежда Гармаева тылбаастаабытта көстөр. Сорох сирдэргэ түөлбэ тыллар уонна этиилэр баалларын олус интэриэһиргээтим. Бурятия прозата өссө биир үчүгэй айымньынан байда диэн этиэхпин баҕарабын. Ааптар бурят тылынан кинигэлэрин илдьэ кэлбитигэр олус махтанабын», -– диэн махтал тылларын эппитэ.
Евдокия Иринцеева -– СӨ үөрэҕириитин туйгуна, СӨ бэчээтин туйгуна, «Кыһыл көмүс бөрүө» суруналыыстар бириэмийэлэрин лауреата, суруналыыстыка салаатыгар СӨ Судаарыстыбаннай бириэмийэтин лауреата, РФ Суруналыыстарын сойууһун «За заслуги перед профессиональным сообществом» бочуоттаах бэлиэтин хаһаайката, СӨ култууратын үтүөлээх үлэһитэ, «Аһаҕас Евразия-2016» литература аан дойдутааҕы куонкуруһун Мария Шевель аатынан бириэмийэ лауреата, оҕо уонна ыччат литературатыгар аан дойдутааҕы сэбиэт (BBY-International Board On Books For Young People)  Бочуотун испииһэгэр киллэриллибитэ.

Надежда ЕГОРОВА, «Саха сирэ» хаһыат,  edersaas.ru

+1
0
+1
0
+1
0
+1
0
+1
0
+1
0
+1
0