Бүгүн сарсыарда Дьокуускай куорат Былатыан Ойуунускай аатынан авиапордугар пассажирдары көрсөр саала аттыгар дьон бөҕө үмүөрүспүт. «Кимий?» дииллэр, «Кини», — дииллэр, «Дьоруой», — дииллэр…
Дьоруой аата Владимир Африканович Михайлов, Сунтаар улууһун «Кириэстээх» кэпэрэтиип ыанньыксыта, Үлэ Албан аатын 3 истиэпэнин уонна “Хотугу сулус” уордьаннар кавалердара, Саха Өрөспүүбүлүкэтин норуотун хаһаайыстыбатын үтүөлээх үлэһитэ.
Арассыыйа күнүгэр, бэс ыйын 12 күнүгэр, биир дойдулаахпыт Владимир Путин илиититтэн РФ Үлэ Дьоруойа кыһыл көмүс сулуһу туппута.
Дьоруой ыанньыксыты авиапорка СӨ тыатын хаһаайыстыбатын миниистирэ Александр Атласов көрсөн эҕэрдэлээтэ, ытыс тыаһын ортотугар сибэкки дьөрбөтүн туттарда.
Түгэнинэн туһанан, «Сахамедиа РИИХ» АУо кэлэктиибэ Владимир Африкановиһы эҕэрдэлиир. Эйигин Кириэстээххэ баар Бордоҥ сайылыгын хатыҥ чараҥа, кэрэ тыата самаан сайын кэлбитинэн силигилии тыллан, айхаллыы-уруйдуу көрүстүн диэн алгыспытын тиэрдэбит.