Тыа хаһаайыстыбатын уонна ас-үөл бэлиитикэтин министиэристибэтин көрүдүөрүгэр бу күннэргэ киһи батыспат үлүгэрэ. Манна бэҕэһээҥҥиттэн бырабыыталыстыба бэрэссэдээтэлин бастакы солбуйааччы-миниистир Петр Алексеев салайааччылаах хамыыһыйаҕа нэһилиэктэр баһылыктара кыаммат ыалларга тыа хаһаайыстыбатын үлэтин тэринэллэригэр көмөҕө анаан 1-дии мөлүйүөнү ылар иһин бырайыактарын көмүскүүллэр.
Василий Никифоров, «Саха сирэ» хаһыат, edersaas.ru
Саната таарыйа эттэххэ,быйыл аан маҥнай ыытыллар куонкуруска барыта 282 нэһилиэктэн сайаапка киирдэ. Бэнидиэнньиккэ бастакы түһүмэххэ 69 нэһилиэги көрөргө испииһэк оҥорон ыйаабыттарыттан күнүскү чэй кэнниттэн киэһэ хойукка диэри 46 баһылык көмүскэннэ. Хамыыһыйа чилиэнэ, миниистири солбуйааччы Николай Петров: «Үөрэннэхпитинэ, түргэтиэхпит», – диир. Бүгүн иккис түһүмэххэ эмиэ күн аҥаарыгар биир итиччэ киһи ааһыахтаах. Испииһэккэ ким сайаапкатын хасыһынан киллэрбитэ аахсыллыбыт курдук эрээри, улуустарынан араараннар, бутуурдаах буолбут. Ону Николай Ильич: «Ыраахтан кэлээччилэри, айаннарын учуоттаан, кэннигэр сыҕарытан биэрдибит», – диэн быһаарар.
Хамыыһыйа сарсын, ыам ыйын 31 күнүгэр, сарсыарда 9 чаастан киэһэ 6 чааска диэри үлэлээн, 100-тэн тахса баһылыгы истиэҕэ. Бүтэһик төрдүс күҥҥэ хамыыһыйа хотугу улуустар нэһилиэктэрин баһылыктарыгар анаан видеоконференция тэрийэргэ былаанныыр. Ол гынан баран, сорохтор Дьокуускайга кэлбиттэр эбэтэр куоракка баар бэрэстэбиитэллэрин ыыппыттар. Сөп ээ: илэ киирсэр эрэбил буолара биллэр.
Көрүү түмүгүнэн бастакы 100 кыайыылаах быһаарыллан, судаарыстыба бүддьүөтүттэн 1-дии мөлүйүөннээх көмө үп тиксэриллиэ. Онтон кэлэр үс сылга сыл ахсын эмиэ сүүстүүнэн хаалбыт нэһилиэктэр бары кэриэтэ хапсыахтара.
Василий Никифоров, «Саха сирэ» хаһыат, edersaas.ru