Азалия Аскольдовна, сарсыарда аайы кыыһын хайаан да аһатан, таҥаһын бэрэбиэркэлээн ыытар бэйэтэ, бүгүн хойутаан уһугунна. Чаһы тоҕуһу ааспыт, үлэтигэр барара бу кэлбит. Бэҕэһээ, үлэтигэр олордоҕуна, арахсыбыта сыл буолбут кэргэнэ төлөпүөннээн утуйар уутун уйгуурта. Түүнү быһа арааһы эргитэ санаан, олох утуйбата.
Азалия Аскольдовна төрөппүт ийэтэ, кинини төрөөрү быстыбыт буолан, ийэ сылаас тапталын билбэккэ улааппыта. Икки эмдэй-сэмдэй эдьиийдэрэ көрөн-истэн улаатыннарбыттара. Аҕалара Аскольд Артурович, сопхуоска тырахтарыыстыыр буолан, дьиэҕэ үксүн ыалдьыт-хоноһо курдук сылдьара. Биир тарбыйахтаах ынах хаалбытын ханнык эрэ урууларыгар көрдөрөрө. Оскуолаҕа киирэн баран Азалия ийэтэ суоҕа куһаҕанын, дьэ, өйдөөбүтэ. Оҕолор бары ийэлээхтэр, олор оҕолорун тустарыгар наар кыһаллар, сүүрэр-көтөр эбиттэр, арай кыра Азаҕа ким да көмөлөспөт эбит, эдьиийдэрэ наар оскуолаҕа кэлэ-бара, бэйэлэрэ бокуойа суох сылдьар эбиттэр.
Иккис кылааска киирэр күһүнүгэр аҕата үс оҕолоох огдообо дьахтары кэргэн ылбыта. Балыыһаҕа бүөрүн эмтэтэригэр көрөр санитарка Маарыйата Азалия ийэтэ буолбута. Маарыйа икки кыыс уонна уол оҕолоох этэ, Аскольд, онон, алта оҕону иитэр аҕа буолбута. Маарыйа сүөһүлээх, сибиинньэлээх буолан, онуоха бэйэлэрин торбуйахтаах ынахтара эбиллэн, сайын аайы бары оттуур буолбуттара. Урут ийэ диэн тугун билбэтэх кыра Аза Маарыйаҕа тута сыстыбыта, оттон атыттар, иирсибэт курдук эрээрилэр, тус-туспалара биллэрэ. Олус асчыт, бүгүрү, көнө сүнньүлээх Маарыйа хайаларын да араарбакка тэҥҥэ тутара, мөҕө-этэ барбакка, сүбэлии сылдьар идэлээҕэ. Аскольд Артурович, төһө да боростуой тырахтарыыс буоллар, куораттан төрүттээҕэ, Дьокуускайга уруулардаах этэ. Сылга биирдэ эт, сүөгэй кэһиилэнэн күүлэйдии киирэрэ. Кыраларын, Азалаах Викторы, илдьэ барара. Оҕолор онно сөҕүү-махтайыы бөҕө буолаллара; уулуссаларга массыына бөҕөтө, куорат дьиэлэрэ таас уонна аһара үрдүктэрэ; киһи хараҕа халтарыйар маҕаһыыннара бааллара уонна тоҕо эрэ бары нууччалыы саҥараллара. Оннооҕор кинилэр аҕалара нууччалыы эрэ кэпсэтэр буолан хаалара. Азалиялаах Виктор аҕалара куоракка олох атын киһи буола түһэрин дьиктиргииллэрэ, кини, киинэҕэ көстөр дьон курдук, пианиноҕа сатаан оонньуур эбитин сөхпүттэрэ. Түүннэри-күнүстэри тимир көлөтүнэн от-мас, балбаах, араас таһаҕас таһар аҕалара куоракка адьас атын — көнө уҥуохтаах, күлэ-үөрэ сылдьар сирэйдээх, мап-мааны көстүүмнээх буолан хаалара дьиктитик көстөрө. Азалия, кыра да буоллар, аҕатын тоҕо эрэ аһына саныыра, «арааһа кини тыаҕа тэһийбэтэ буолуо, биһигини эрэ иитээри, көннөрү киһи олоҕунан олорор быһыылаах» диэн уорбалыыра. «Бу курдук үчүгэй куоракка, мааны дьоҥҥо куотуо» диэн кыра эрдэҕинэ куттанар этэ.
Аскольд, куорат биир көстөр-биллэр ыалын оҕото, тыаҕа таптыыр кыыһын сырсан көспүтэ, үс оҕолоох огдообо да буолан баран, дьонугар төннүбэтэҕэ. Сааһыран эрэр төрөппүттэрэ сыа кырбас үс оҕону кыайан көрбөттөрүн билэрэ бэрт буоллаҕа. Маарыйалыын кыһалҕаттан холбоспуттара эрээри, Аскольд аан бастаан ыалынан нус-хас олоруу диэни билбитэ.
Маҥнайгы кэргэнэ эдэриттэн ыарыһах буолан, дьиэҕэ-уокка сыстаҕаһа суох курдуга, саатар кыргыттарын оҕолоноругар наар хаана барар буолан, балыыһаҕа өр эмтэнэрэ. Онуоха эбии кыыс детдомҥа иитиллэн, дьиэни-уоту көрөрүгэр мунаарара элбэҕэ. Бэйэ-бэйэлэрин олус таптаһар буоланнар, кыраҕа кыһаллыбакка, күннээҕинэн олорор курдуктара. Аскольд, дьон көрбөтүгэр кэргэнин көтөҕө сылдьан ууруура-сыллыыра, араас хоһооннору ааҕара, тугу баҕарарын толоро сатыыра — ол курдук күүстээхтик Розатын таптыыра.
Ангелина ДАНИЛОВА кэпсээниттэн ылылынна.