Ил Дархан быйылгы Анал этиитигэр 2018 сылы Дьарыктаах буолуу сылынан биллэрдэ итиэннэ олохтоох оҥорон таһаарыыны сайыннарыы, хаһаайыстыбалары бөҕөргөтүү онуоха улахан суолталаахтарын бэлиэтээтэ.
Петр Алексеев, Саха Өрөспүүбүлүкэтин Бэрэссэдээтэлин Бастакы солбуйааччы – Тыа хаһаайыстыбатын уонна ас-үөл бэлиитикэтин миниистирэ:
– Егор Афанасьевич Анал этиитигэр экономика бары эйгэтигэр болҕомтотун уурда. Чуолаан тыа хаһаайыстыбатын ыллахха, 2017 сылтан олоххо киллэриллибит “Тыа хаһаайыстыбатын туһунан сокуон” чэрчитинэн саҕаламмыт үлэ салҕаныа, бас билии көрүҥүттэн тутулуга суох бары хаһаайыстыбалар тэҥҥэ тутуллан өйөнүөхтэрэ диэн тоһоҕолоон эттэ. Тыа хаһаайыстыбатын анал үөрэхтээх исписэлиистэринэн хааччыйар, үлэһиттэр идэлэрин үрдэтэр итиэннэ хотон-хонуу үлэһитин аатын-суолун өрө тутар инниттэн быйыл сайын тахсыбыт «Тыа хаһаайыстыбатыгар каадыр бэлиитикэтин туһунан» ыйаах быһыытынан анал үөрэх кыһаларыгар практиканы кэҥэтэр, производственнай базалары хаҥатар соругу туруорда. Үүнэр 2018 сылы Дьарыктаах буолуу сылынан биллэрэн туран, олохтоох оҥорон таһаарыыны сайыннарар үлэ-хамнас тэрээһинин күүһүрдэр туһунан өссө төгүл чиҥэттэ. Биһиги, Тыа хаһаайыстыбатын уонна ас-үөл бэлиитикэтин министиэристибэтэ, бу боппуруоска улуус уонна нэһилиэктэр дьаһалталарын кытары бииргэ, кимиилээхтик үлэлиэхпит. Даҕатан эттэххэ, “Саха сиригэр оҥоһулунна” диэн бырайыагынан быйыл сайын Дьокуускай куоракка саҕалаабыт үлэбитин күүһүрдүөхпүт, кэҥэтиэхпит.
Раиса Сибирякова, “Саха сирэ” хаһыат, edersaas.ru.