Бүгүн Дьокуускайга, А.Е.Кулаковскай аатынан норуоттар доҕордоһууларын дьиэтигэр, долгутуулаах уонна улахан эппиэтинэстээх тэрээһин буола турар. Ол курдук, түһүлгэҕэ мустубут ыалдьыттарга «Сомоҕолоһуу. Ситиһиилэр. Инники былааннар» диэн айар отчуот алтыс төгүлүн ыытыллар.
Ол эбэтэр, ааспыт сыл устатыгар бу Норуоттар доҕордоһууларын дьиэтин иллээх-эйэлээх, үлэһит кэлэктиибэ куорат иһигэр, улуустарга, түмсүүлэргэ, улахан дьоҥҥо уонна оҕолорго, ыраахтан-чугастан кэлэр ыалдьыттарга, Арассыыйаны уонна тас дойдуну хабан туран, туох далааһыннаах үлэни тэрийбитин, куонкуруһу оҥорбутун, күрэхтэһиилэри, быыстапкалары муоһалаабытын, туох саҥа сүүрээни киллэрбитин бар дьонугар өссө төгүл билиһиннэрэр, инники былаанын сырдатар, сүбэ-саргы түһүлгэтигэр ыҥырар.
Манна даҕатан эттэххэ, үлэ сүрүн болҕомтото өрүү буоларыныы, норуоттар икки ардыларынааҕы сыһыаны олохтооһуҥҥа, харыстааһыҥҥа, хас биирдии норуот үгэһин, сиэрин-туомун, тылын-өһүн, култууратын бүөбэйдииригэр, кэнчээри ыччакка иҥэрэригэр үлэни тэрийэргэ көмөлөһүү, өйөбүл буолуу, норуоттар култуураларын ытыгылааһыҥҥа, билиигэ-көрүүгэ, үөрэтиигэ, сэҥээриигэ, чинчийиигэ о.д.а. ууран, суолта биэрэн тиһиктээхтик үлэлэһии буолар.
Алтыс төгүлүн ыытыллар, сыллааҕы үлэни түмүктүүр отчуокка эмиэ хаһан баҕарар буоларыныы, дьоҥҥо интэриэһинэй, ураты быыстапкалар, үлэни-хамнаһы көрдөрүүлэр бырагыраамаҕа киллэрилиннилэр.
— Сарсыардаттан бастакы мэндиэмэҥҥэ «Сомоҕолоһуу. Ситиһиилэр. Инники былааннар» үлэни билиһиннэрэр быыстапка.
— «Культурой связанные судьбы» хаартысканан быыстапка.
— эдэр олоҥхоһуттар кулууптарын билиһиннэрии, мрамор саалаҕа, 2-с мэндиэмэҥҥэ.
— «Живая энергия северных игр» үһүс төгүлүн ыытыллар бэстибээл. Хотугу норуоттар оонньууларыгар 4-6 кылаас оҕолоро күрэхтэһэллэр. Наартаны ойуохтара, маамыктаны быраҕыыга, туйаҕы уонна хаарынан сүүрэргэ атахха кэтиллэр анал тэрили кэтэн баран сырсыахтара, дүлүҥү анньыыга, «Дьарҕаа балыгы хаптарыыга», «Ноорига» о.д.а. илин-кэлин түсүһүөхтэрэ. Күөн күрэс балеттар бэлэмнэнэр саалаларыгар ыытыллар.
— «Доҕордоһуу» квест. Мрамор саалаҕа, 2-с мэндиэмэҥҥэ.
— «Сюрприз» үҥкүү норуодунай ансаамбыла аһаҕас уруогу ыытар. Үҥкүүнэн дьарыктанар оҕолор туохха үөрэммиттэрин көрдөрүөхтэрэ. Кэнсиэртиир саала, 1 мэндиэмэн.
— «Гуляй на Святки без оглядки!» бырааһынньык көрө-нара, 2-с мэндиэмэҥҥэ ыытыллар.
— «Россия многонациональная» билиини-көрүүнү тургутар оонньууга кыттыҥ. 225 каб.
— «Микрофон Дружбы-2019» ыччат бырайыага, мрамор саалаҕа.
-«Сомоҕолоһуу. Ситиһиилэр. Инники былааннар» сыллааҕы үлэни билиһиннэрии, сырдатыы.
Хас биирдии хайысхаҕа эппиэтинэстээхтэр талыллан үлэлииллэр. Көрөөччүлэр, сэҥээрээччилэр ыйытыыларыгар толору хоруйдары биэрэллэр.
Маннык тэрээһин биир сүрүн уратыта, сэҥээрбит, билиэн-көрүөн баҕарбыт дьон атах тэпсэн олорон сэһэргэһэллэригэр, ыйытыыларыгар хоруйдары тута ылалларыгар ананар.
Кэлиҥ, сылдьыҥ, ыалдьыттааҥ. Үлэни-хамнаһы билсиҥ.
А.Е.Кулаковскай аатынан норуоттар доҕордоһууларын дьиэтин пресс-сулууспата.
Хаартыскалар: интэриниэт, А.Е.Кулаковскай аатынан норуоттар доҕордоһууларын дьиэтин пресс-сулууспата