Дьокуускайдааҕы килиэп кэмбинээтэ оҥорон таһаарыыны кэҥэтэр былааннаах. Бүгүҥҥү күҥҥэ килиэп собуота киин куорат уонна аттынааҕы бөһүөлэктэр килиэпкэ наадыйыыларын толору хааччыйар кыахтаах. Оннооҕор чугастааҕы улуустары эмиэ сибиэһэй килиэбинэн хааччыйар диэн СИА суруйар.
Кэмбинээт үлэтэ-хамнаһа нэһилиэнньэни сибиэһэй уонна хаачыстыбалаах бородууксуйанан хааччыйыыга туһуланар. Бу куоракка стратегическай суолталаах тэрилтэ буолар, онон күнүстэри-түүннэри үлэ тохтообот. «Хлеб — всему голова» диэн нуучча өһүн хоһооно мээнэҕэ этиллибэт.
Бородууксуйаны оҥорон таһаарарга бурдук саппааһа сайын уу суола аһыллыар диэри толору тиийэр диэн кэмбинээт салалтата эрэннэрэр. Ону тэҥэ, өссө хойукка диэри тиийэрин курдук, саппааһы хаһааныы үлэтэ ыытыллар.
Бүгүҥҥү күҥҥэ сыана уруккунан хаалан турар. Килиэп социальнай суолталаах суортарыгар сыана 2018 сылтан үрдүү илик. Кэмбинээт өрөспүүбүлүкэтээҕи суһал ыстаабы кытары бииргэ үлэлэһэр, онон сыананы үрдэппэт туһугар сыралаһар.
Дьокуускайдааҕы килиэп кэмбинээтин бородууксуйата киин куораты таһынан, Мэҥэ Хаҥалас, Чурапчы, Амма, Уус Алдан, Таатта, Нам, Горнай, Хаҥалас улуустарыгар атыыланар. Ону тэҥэ, “Якутопторг” хампаанньа нөҥүө хотугу улуустарга эмиэ тиэрдиллэр. Атын улуустартан урбаанньыттар бэйэлэрэ кэлэн атыылаһан бараллар.
Ангелина Васильева, “Саха сирэ” хаһыат, edersaas.ru