Өрөспүүбүлүкэҕэ аан бастакытын икки түһүмэҕинэн «Хлеб—всему голова» бэстибээл ыытылынна. Болҕомтону тардыбыт сэргэх тэрээһин А.Е.Кулаковскай аатынан норуоттар доҕордоһууларын дьиэтигэр ыытылынна.
Бэстибээли СӨ урбааҥҥа, эргиэҥҥэ уонна туризмҥа министиэристибэтин өйөбүлүнэн Атыы-эргиэн бырамыысыланнай балаатата тэрийдэ. Сиһилии СӨ Атыы-эргиэн промышленнай балаататын экспертизаҕа киинин салайар Антонина Петровна Антонова тэрээһин туһунан сырдатта:
—Урут «Хлеб — всему голова» диэн быыстапка-дьаарбаҥка ыытыллар эбит буоллаҕына, бу сырыыга уларытан бэстибээл оҥордубут. Бастакы түһүмэх олунньу 11 күнүттэн өрөспүүбүлүкэ улуустарыгар саҕаламмыта. Тыа сирдэрэ бары өрө көтөҕүллэн олус көхтөөхтүк кытыннылар, миэстэтигэр на7аа 8ч8гэйдик тэрийдилэр. Түгэнинэн туһанан, ордук үөрэн туран, Сунтаар улууһун бэлиэтиэхпин баҕарабын. Кинилэр «Бастыҥ биэкэр», «Бастыҥ кондитер» уонна «Килиэп астыыр бастыҥ тэрилтэ» диэн күөн күрэстэри тэрийэн ыыппыттара дьону-сэргэни олус сэргэхсиппит. Бу тэрээһиннэригэр сунтаардар өссө үтүө санааланыы аукционун оҥорбуттар. Аҕалыллыбыт минньигэс аһы-үөлү тулаайах оҕолор дьиэлэригэр уонна элбэх оҕолоох ыалларга түҥэппиттэр. Маны сэргэ, Намҥа бэртээхэй тэрээһин буолбутуттан кыттыбыт дьон уонна нэһилиэнньэ улаханнык астыммыт. Намнар маннык хабаанаах тэрээһин сотору-сотору ыытыллара буоллар, урбаанньыттарга да, атыылаһааччыларга да абыраллаах буолуо эбит дэспиттэр.
Иккис түһүмэх Дьокуускайга буолла. Куорат киин бибилэтиэкэтэ уонна кииннэммит бибилэтиэкэ 22-с №-дээх филиала «SMART 2.0.3.» быыстапка-экспозиция оҥордулар. Оттон «төгүрүк остуолга» элбэх наадалаах боппуруос көрүлүннэ. Ол курдук, саҥа ньыманы туһаныы, хоту дойду сырьетуттан биопрепараттары туттуу, килиэп арааһын астыырга уонна бурдуктан араас минньигэс астары буһарарга үөрэтии, бурдук аһы батарыы, атыылааһын туһунан киэҥ хабааннаах кэпсэтиигэ, санаа атастаһыытыгар тэрээһин кыттыылаахтара көхтөөхтүк кытыннылар. Дьокуускайдааҕы килиэби астыыр кэмбинээт лабыкталаах килиэбин аҕалан амсатта, билиһиннэрдэ. Салгыы быраас, диетолог, ХИФУ Ульяна Лебедева килиэп киһи доруобуйатыгар дьайыытын туһунан билиһиннэрдэ. Биэкэр уонна кондитер идэтэ ыччакка төһө наадалааҕын туһунан устудьуон Мариетта Байская сырдатта. Кэпсэтиигэ биэкэрдэри, кондитердары бэлэмниир үөрэх кыһатыттан, потребкооперация атыы-эргиэн кэллиэһиттэн, технологическа техникумтан, өрөспүүбүлүкэтээҕи техникум-интернаттан, уо.д.а. тэрилтэлэртэн кытыннылар, санааларын үллэһиннилэр.
Тэрээһин чөл, чэгиэн олоҕу тарҕатар, килиэпкэ, бурдук аска харыстабыллаах сыһыаны олохтуур, килиэби астаан таһаарар олохтоох бэкээринэлэри, урбаанньыттары өйүүр, килиэби астыыр дьоҥҥо тирэх буолар, үлэлэрин сайыннаралларыгар, кэҥэтэллэригэр көмөлөһөр сыаллаах тэрилиннэ. Сүрүн соругунан килиэби астааһын аныгы култууратын киллэрии, килиэби уратытык, туспатык астааһыны билии, килиэби астыыр биэкэр идэтэ улахан эппиэтинэстээх буоларын , бу үлэ сыраттан тахсарын өйдөтүү буолла, — диэтэ.
Бу тэрээһин чэрчитинэн, өрөспүүбүлүкэ олохтоохторугар анкета толотторбуттар. Манна 600 киһи 16 ыйытыыга хоруйдаабыт. Ыйытыыларга, холобур, килиэп салапаан хахтаах атыыланара ордугун дуу, хаҕа да суох атыыланыан сөбүн дуу, эбэтэр ханнык килиэби ордук сөбүлүүллэрин, о.д.а. ыйыппыттар. Антонина Петровна бэлиэтииринэн, маннык ыйытыылары нэһилиэнньэҕэ тэрийэн ыытыы үлэни сайыннарарга тоҕоостоох.
Өксөкүлээх Өлөксөй аатынан норуоттар доҕордоһууларын дьиэтигэр буолбут тэрээһиҥҥэ уонча тэрилтэ, үөрэх кыһалара үөрэн-көтөн туран ис сүрэхтэриттэн бэлэмнэнэн, оҥостон, сүргэлэрэ улаханнык көтөҕүллэн туран кытыннылар, астарын-үөллэрин аҕалан атыылаатылар, амсаттылар.
Түһүлгэҕэ көрө-истэ, атыылаһа кэлбит дьоҥҥо-сэргэҕэ туһалаах, бэртээхэй маастар-кылаастар ыытылыннылар. Ким баҕалаах минньигэс аһы киэргэтэргэ, салпыакканы кырасыабайдык суулаан остуолга уурарга, түөскэ кэтэргэ килиэп быһыылаах оҥоһуллубут боруостары кырааскалыырга үөрэннилэр.
Бэстибээл түмүгүнэн көхтөөхтүк кыттыбыттарга грамоталар, бука барыларыгар сэртипикээттэр туттарылыннылар. «Бастыҥ биэкэр», «Килиэби астыыр бастыҥ тэрилтэ», «Бастыҥ кондитер» анал ааттар аныахтаахтар. Манна даҕатан бэлиэтээтэххэ, маннык номинациялар улуустарга дьүүллүүр сүбэлэр быһаарыыларынан эмиэ туттарыллыбыттар. Онон улуустар улаханнык сэргэхсийэн, үлэлэрин-хамнастарын өссө күүһүрдэн, сайыннаран биэрэр санааламмыттар.
Кэпсэтии түмүгэр, Антонина Петровна өрөспүүбүлүкэтээҕи күөн күрэс Аллараа Бэстээххэ былааннанарын, Намҥа элбэх тэрээһин былааннанарын, оттон эстэпиэтэ палочката Аммаҕа Покровка сэлиэнньэтигэр, бурдугу үүннэриинэн дьарыктаммыт Черкашиннар утумнааччыларыгар Олег Черкашиҥҥа, «Амма» ТХПК-ттан Ольга Огурешниковаҕа туттарыллыбыт.
Сардаана Баснаева, «Саха сирэ» хаһыат, edersaas.ru
Игорь Петров хаартыскаларга түһэриитэ