Кикбоксиҥҥа Арассыыйа чөмпүйэнээтин үөрүүлээх аһыллыытын кэмигэр кыттааччылар санааларын ыйыталастым.
Аан бастакынан күрэхтэһии судьуйата Константин Константинов санаатын үллэһиннэ:
— Мин урут кикбоксинг көрүҥүнэн дьарыктана сылдьыбытым. Быйыл Уһук Илин чөмпүйэнээтин кэнниттэн судьуйалар семинардарыгар сылдьаммын, бу Арассыыйа чөмпүйэнээтигэр судьуйалыыр кыахтанным. Саха уолаттара үчүгэйдик кыттан эрэллэр, эрэлбит улахан. Олимпийскай систиэмэ буолан, хотторбуттар туораан иһэллэр. Тэрээһин олус үчүгэй. Мин санаабар, дойдуга маннык үрдүк таһымнаах күрэхтэһии өссө буола илигэ.
Салгыы кэрэ сэбэрэлээх, нарын-намчы кыттааччы кыыс олорорун көрөммүн, кинини кытары кэпсэтэргэ сананным.
Дарья Пунтус, Санкт-Петербург куорат:
— 52 кг ыйааһыҥҥа киирсиэхтээхпин. Кикбоксинынан дьарыктаммытым икки ый эрэ буолла. Ол иннинэ өр сылларга тайскай боксанан дьарыктаммытым, Арассыыйа чөмпүйүөнэбин. Бу көрүҥ уонна кикбоксинг майгыннаһаллар. Онон, бэлэмнэнэрбэр улахан мэһэйдэри көрсүбэтим.
Кыргыттар охсуһуу, тустуу курдук көрүҥнэргэ быһыыларын-таһааларын тупсараары эбэтэр көннөрү тугу эрэ атыны боруобалаары кэлэллэр дии саныыбын. Алта сыл анараа өттүгэр тайскай бокса секциятыгар чуҥкуйууттан быыһанаары кэлбитим. Уонна бу көрүҥү сөбүлээн, баччааҥҥы диэри дьарыктанан кэллим.
Виктория Бястинова, edersaas.ru саайт, «Саха сирэ» хаһыат.
Ааптар хаартыскаҕа түһэриилэрэ.