Успуорт

Кикбоксиҥҥа Арассыыйа чөмпүйэнээтигэр 506 кыттааччы кэллэ



Бу туһунан бүгүн өрөспүүбүлүкэтээҕи пресс-кииҥҥэ ыытыллыбыт пресс-кэмпириэнсийэҕэ эттилэр. Суруналыыстар ыйытыыларыгар СӨ Бырабыыталыстыбатын бэрэссэдээтэлин солбуйааччы Сергей Местников, СӨ успуордун миниистирэ Иннокентий Григорьев, Арассыыйа кикбоксинын федерациятын вице-президенэ Александр Березкин, Кикбоксинг түмсүүтүн  аан дойдутааҕы ассоциациятын норуоттар икки ардыларынааҕы сибээһин дириэктэрэ Виктория Украинцева, СӨ кикбоксинын федерациятын президенэ, ЛОРП генеральнай дириэктэрэ Сергей Ларионов эппиэттээтилэр.

edersaas.ru

Кикбоксиҥҥа Арассыыйа чөмпүйэнээтин уонна күрэхтэһиитин үөрүүлээх аһыллыыта номнуо сарсын Дьокуускайга “Триумф” спортивнай уораҕайыгар буолар. Арассыыйа кикбоксинын федерациятын вице-президенэ Александр Березкин онуоха манныгы эттэ:

Арассыыйа чөмпүйэнээтэ Уһук Илиҥҥэ аан маҥнайгытын ыытыллар. Мин үлэлиирим тухары маннык ымпыгар-чымпыгар диэри толкуйдаммыт тэрээһиннээх күрэхтэһии суоҕа. Мин санаабар, хас биирдии эрэгийиэн кикбоксиҥҥа маннык сыһыаннаһара буоллар, бу көрүҥ өссө сайдан, олимпиадаҕа киирэрбит биллэ чэпчиэ этэ, — диэн Александр Березкин кэпсээтэ.

Кини этэринэн, кикбоксинг көрүҥэ 2023 сыллаах Европейскай олимпиадаҕа экспериментальнай күрэхтэһии быһыытынан киирэрэ былааннанан турар эбит.

ЛОРП генеральнай дириэктэрэ, СӨ кикбоксинын федерациятын президенэ Сергей Ларионов кыттааччылар көтөн кэлэр билиэттэригэр чэпчэтии оҥордубут диэн кэпсээтэ.

СӨ успуордун миниистирэ Иннокентий Григорьев кыайыылаахтарга уонна миэстэлэспиттэргэ биэрэр мэтээл туһунан манныгы эттэ:

Мэтээлбит дизайнера Диана Баишева. Олус интэриэһинэйдик толкуйдаммыт, ураты ис хоһоонноох тутуллаах. Эмиэ да кубок, эмиэ да мэтээл. Мэтээл тула Саха сиригэр кикбоксинг сайдыытын көрдөрөр үктэллэрдээх. Дизайнер толкуйунан, бу үктэллэринэн кикбоксердар Олимпиадаҕа тахсыахтаахтар диэн.

СӨ кикбоксинга сүрүн тренерэ Андрей Алексеев:

Уолаттар бэлэмнэрэ үчүгэй. Кими даҕаны чорботон этэр кыаҕым суох, бары туох баардарын биэрэн туран дьарыктаннылар, бэлэмнэннилэр. Саха национальнай көрүҥнэриттэн хапсаҕай элеменнарын дьарыкпытыгар киллэрээччибит. Инникитин атах оонньуутун киллэрбит киһи диэн баҕа санаалаахпын. Урукку бэтэрээннэри барыларын кэриэтэ ыҥыраммыт көмөлөһүннэрдибит.

 

Виктория Бястинова, edersaas.ru саайт, «Саха сирэ» хаһыат.

Ааптар хаартыскаҕа түһэриилэрэ.

0
0