Атырдьах ыйын 27 күнүгэр Арассыыйа киинэтин күнэ бэлиэтэнэр. Саха сиригэр “Киинэ түүнэ” Бүтүн Арассыыйатааҕы аахсыйа ыытыллыаҕа.
Арассыыйаҕа оҥоһуллубут киинэлэри Дьокуускайга, Мииринэйгэ, Ленскэйгэ, Өлүөхүмэҕэ, Жатайга, Төҥүлүгэ, Чурапчыга, Уус Алдаҥҥа босхо көрдөрүөхтэрэ.
Киин куоракка бу аахсыйаҕа кэлбит 14-22 саастаах эдэр дьоҥҥо Пушкинскай каартаны оҥортороллоругар көмөлөһүөхтэрэ.
— Саха киинэтэ аан дойдуга билиниини ылыар диэри уонунан сылларга эриирдээх суолу ааспыта. Саха режиссердарын үлэлэрэ “Кинотавр”, Москватааҕы норуоттар икки ардыларынааҕы киинэ бэстибээлин курдук улахан түһүлгэлэргэ бириистээх миэстэлэри ылара олус кэрэхсэбиллээх. «Феномен якутского кино» диэн бүтүн Арассыыйаҕа билиннэ, — диэн Ил Дархан Айсен Николаев этэр.
Аахсыйа дойдуга сэттис сылын ыытыллар. Быйыл «Чемпион мира», «Пара из будущего», «Последний богатырь: Посланник Тьмы» киинэлэри «Сахафильм» “Өрөспүүбүлүкэ” саалатыгар киэһэ 10 чаастан уонна «Россия — моя история» мусуойга киэһэ 5 чаастан босхо көрүөххэ сөп.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru