СӨ Бырабыыталыстыбатын дьаһалынан, 2022 сылга өрөспүүбүлүкэ уонча сэлиэнньэтигэр киинэ саалалара аһыллыахтара. Муниципалитеттар истэригэр куонкурус ыытыллыбыта.
СӨ Култуураҕа уонна духуобунай сайдыыга миниистирин бастакы солбуйааччы Владислав Левочкин иһитиннэрэринэн, биир мөлүйүөн солкуобайы кыайбат суумалаах анал тэрили атыылаһарга субсидия көрүллэр эбит. Манна проекционнай аппаратура, көмпүүтэр, онно лицензиялаах бырагыраама, монитор, каасса тиэхиньикэтэ киирэр. Атынын куонкурус усулуобуйатын быһыытынан муниципалитет бэйэтэ уйунуохтаах.
— Арассыыйаҕа Киинэ күнүгэр, атырдьах ыйын 27 күнүгэр, Кэбээйигэ, Мэҥэ Хаҥаласка уонна Чурапчыга киинэ саалалара аһыллыахтара. Бу үс киинэ саала аһыллаат даҕаны тута «Киинэ түүнэ» аахсыйаны тэрийиэхтэрэ. Манна «Чемпион мира», «Пара из будущего», «Последний богатырь: Посланник Тьмы» киинэлэр көстүөхтэрэ, — диэн Левочкин этэр.
Бу туһунан СӨ Култуураҕа уонна духуобунай сайдыыга министиэристибэтин пресс-сулууспата иһитиннэрэр.