Өлүөхүмэ улууһун биир маҕаһыынын сейфэтиттэн 165350 солк. харчыны уорбуттар. Полицияҕа сайабылыанньаны маҕаһыын хаһаайына киллэрбит.
Бу итирдэр утахтары атыылыыр маҕаһыын атыы-эргиэн дьиэтигэр баар эбит. Сүтүктээх хаһаайын быһаарбытынан, уоруу түүн тахсыбытын туһунан киниэхэ харабыла тыллаабыт.
Полиция оперативниктара суһал-ирдиир тэрээһиннэр кэмигэр бу уорууга 29 саастаах харабыл бэйэтэ сыһыаннааҕын быһаарбыттар. Уорбаланааччы буруйун билиммит.
Барыллаан быһаарыынан, кини сейфэ күлүүһүн ханна ууралларын билэр буолан, түүҥҥү дьуһуурустубатын кэмигэр сейфэттэн харчы уорарга санаммыт. Итиэннэ кинини уорбалаабаттарын, атын дьон киирэн уорбутун курдук өйдөбүлү үөскэтээри, павильоҥҥа ол-бу маллары ыспыт.
Дьэ, ол кэнниттэн маҕаһыын хаһаайыныгар эрийэн, уоруу тахсыбытын, онно атыылааччылар сыһыаннаах буолуохтарын сөбүн туһунан эппит. Харчыны таһырдьааҥҥы туалет дьааматыгар кистээбит.
Харчыны барытын булбуттар. «Уоруу» ыстатыйанан холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.