Киинэ бэтэрээнэ кинигэтин сүрэхтээтэ

Бөлөххө киир:

Ыам ыйын 6 күнүгэр Өрөспүүбүлүкэтээҕи медиакииҥҥэ СӨ култууратын үтүөлээх үлэһитэ, Арассыыйа Бочуоттаах кинематографиһа, “Гражданскай килбиэн” бэлиэ хаһаайына, Уус Алдан улууһун Байаҕантай нэһилиэгин Бочуоттаах олохтооҕо, киинэ бэтэрээнэ Иннокентий Готовцев “Олоҕум суола” диэн кинигэтин сүрэхтээтэ.

Кинигэ халыҥ, 117 лиистэн, 3 түһүмэхтэн турар. Кини бэйэтин оҕо сааһыттан саҕалаан, хайдах кинематографист буолбутун, бу эйгэҕэ үлэлээбитин-хамсаабытын, ханнык дьоннуун алтыспытын туһунан сиһилии суруйбут. Онон өрөспүүбүлүкэҕэ киинэ ситимин, үлэһиттэрин туһунан сырдатар бастакы кинигэ буолар диэххэ сөп.

90-с сылларга, ыһыллыы-тоҕуллуу уустук кэмигэр Иннокентий Иннокентьевич эрэгийиэннээҕи “киновидеообъединение” тэрилтэтин, онтон СӨ бырабыыталыстыбатын иһинэн кинематография кэмитиэтин салайбыта. “Саха” НКИХ улуустааҕы теле-радиостудияларын салайар отдел начаалынньыгынан үлэлээбитэ. Онон улуустары барыларын кэрийбитэ уонна өрөспүүбүлүкэ нэһилиэктэрин тустарынан документальнай киинэлэри устан үйэтиппит өҥөлөөх. Онон саха киинэтин бүгүҥҥү балысхан сайдыытыгар бастакы көлүөнэ кинематографистар уонна кинилэри утумнааччылар  кылааттара эмиэ баарын умнуо суохтаахпыт.

Кини Калининградтааҕы киинэ техникумун, Санкт-Петербурдааҕы киинэ, тэлэбиидэнньэ институтун, Уһук Илиннээҕи судаарыстыбаннай сулууспа академиятын үөрэнэн бүтэрбитэ. Олоҕун бүтүннүү киинэ сайдыытыгар анаабыта. Дэлэҕэ да И.И. Готовцевы биир дойдулаахтара Киинэ Киэсэ диэн таптаан ааттыахтара дуо?

Иннокентий Готовцевы биир идэлээхтэрэ, кинематогрфия бэтэрээннэрэ, бииргэ үлэлээбит кэлиэгэлэрэ, чугас дьоно, биир дойдулаахтара кэлэн эҕэрдэлээтилэр, элбэх истиҥ тылларын анаатылар.

Ангелина Васильева, “Саха сирэ” хаһыат, edersaas.ru

Хаартыска: ааптар түһэриитэ.

+1
0
+1
0
+1
0
+1
0
+1
0
+1
0
+1
0