Саха Өрөспүүбүлүкэтэ үрдүк квалификациялаах каадырдары бэлэмниир сыалтан, тус сыаллаах үөрэхтээһини ыыппыта быданнаата. СӨ Үөрэҕин уонна наукатын министиэристибэтэ иһитиннэрэринэн, бэс ыйын 26 күнүттэн киин куораттар үрдүк үөрэхтэрин кыһаларыгар докумуону тутуу саҕаламмыт.
edersaas.ru
Саха сирэ тус сыаллаах үөрэхтээһининэн экэниэмикэ, социальнай эйгэ салааларыгар каадырдары бэлэмнээбитэ 27 сыл буолбут. Бу сыллар тухары үгүс ыччат үөрэхтэнэн таҕыста. Быйыл министиэристибэ киин куораттар үрдүк үөрэхтэрин кыһаларыгар — аспирантураҕа, ординатураҕа, магистратураҕа, бакалавриакка/специалитекка уонна өрөспүүбүлүкэ тас өттүгэр баар орто анал үөрэх тэрилтэлэригэр 165 тус сыаллаах миэстэни көрбүтүн биллэрэллэр. Ким баҕалаах барыта үөрэниэн сөп.
Ханнык докумуоннар ирдэнэллэрий?
- Ыйыллыбыт формалаах сайабылыанньа (өрөспүүбүлүкэтээҕи тутар хамыыһыйаҕа миэстэтигэр толоруллар)
- Оскуоланы бүтэрбити туоһулуур докумуон (среднее общее образование) дьиҥнээҕэ
- Хаартыска 3х4 кээмэйдээх (6 устуука)
- Булгуччулаах барыллаан медицинскэй көрдөрүүнү ааспыты туоһулуур медицинскэй ыспыраапка (түмүк) дьиҥнээҕэ
- Үлэҕэ ыстаастаах дьон үлэ биэрээччи бигэргэппит үлэ киниискэтин куоппуйата
- Пааспар куоппуйата эбэтэр ону солбуйар докумуон
- Байыаннай учуот докумуонун куоппуйата. Өскөтүн докумуону сокуоннай сааһын ситэ илик абитуриент бэйэтэ туттарар түгэнигэр, сокуоннай бэрэстэбиитэл дэбиэриннэһин булгуччу көрдөрүллүөхтээх.
Дойду үрдүк үөрэхтэрин кыһаларыгар тус сыаллаах миэстэлэригэр докумуону тутар өрөспүүбүлүкэтээҕи хамыыһыйа быйыл Дьокуускай куорат Водников уулуссатын 1 №-дээх дьиэтигэр — Дьокуускайдааҕы уу тырааныспарын институтугар бэс ыйын 26 күнүттэн от ыйын 5 күнүгэр диэри, сарсыарда 9:00-17:00 тохтобула уонна өрөбүлэ суох ылаллар. 506141, 507927 төлөпүөннэринэн билсиэххитин сөп. Сиһилии СӨ Үөрэҕин уонна наукатын министиэристибэтин саайтыгар «Абитуриенту» салааҕа билсиҥ диэн сүбэлииллэр.
edersaas.ru
Хаартыска: интэриниэттэн.