Алтынньы 31 күнүгэр СӨ бырабыыталыстыбатын бэрэссэдээтэлин бастакы солбуйааччы Алексей Колодезников «Куттала суох уонна хаачыстыбалаах массыына суола» диэн национальнай бырайыак чэрчитинэн киин куорат суолун өрүмүөннээһин туругун туһунан оперативнай штаб мунньаҕын ыытта.
edersaas.ru
Дьокуускай куорат суолун-ииһин туругун, ханнык уулуссалар оҥоһуллан бүппүттэрин куорат мээрийэтэ отчуоттаата.
— Петр Алексеев, Жорницкай, Ларионов уулуссалар уонна Шестаковка 1 учаастага бүтэн, бу күннэргэ туттарыллыахтара, Красильников, Автодорожнай, Иван Арбита уулуссаларын сэтинньи 5-6 күннэригэр уот лаампаларын уларытан баран туттарыахпыт. Автодорожнай уулуссаҕа 2 тохтобул оҥоһулунна. Красильников уулуссаҕа тохтобуллары туруора сылдьабыт. Марха суолугар уот ыскааптара кэлэн туруоруллан, өрөмүөн сэтинньи 15 күнүн диэки бүтүөҕэ. Сэтинньи ый ортотугар диэри куорат бары өрөмүөннэнэ турар суола оҥоһуллан бүтүөҕэ, — диэн мээрийэ бэрэстэбиитэлэ отчуоттаата.
Алексей Колодезников сэтинньи 1 күнүн туругунан куоракка биир да уулусса өрөмүөнэ бүтэн туттарыллыбата диэн түмүк оҥордо. Сэтинньигҥ ханнык үлэ ыытылларын хас биирдии күнүнэн суруйан туттарын диэн соруйда.
Хаартыска http://yakutia24.ru
Ньургуйаана Иванова, edersaas.ru