Балаҕан ыйын 9 күнүгэр Куорат күнүн чэрчитинэн, Дьокуускай төрүттэммитэ 386 сылын бэлиэтиэхпит. Ону көрсөр дьаһаллар өссө атырдьах ыйын бүтүүтэ саҕаламмыттара.
edersaas.ru
Куорат дьаһалтатын үлэтин-хамнаһын хааччыйар управление начальнига Мария Попова иһитиннэрэринэн, атырдьах ыйын 23 күнүттэн балаҕан ыйын 9 күнүгэр диэри 114 уопсастыбаннай-политическай, култуурунай-маассабай уонна спортивнай дьаһаллар былааннаналлар. Балаҕан ыйын 6 күнүгэр баһаартан сэрэхтээх буолуу Биир кэлим дьуһуурунай-диспетчерскэй сулууспатын мониторина ыытыллыаҕа. Балаҕан ыйын 8 күнүгэр Тыыл үлэһиттэрин скверэ уонна Учуутал бульвара аһыллыахтара, «Куттала суох куорат» бырайыак чэрчитинэн Дьокуускайдааҕы телебашняттан видеонан кэтээн көрөр ситим холбонуоҕа.
Куораттааҕы уокуруктарга оҕо оонньуур былаһааккаларын арыйыы сиэрэ-туома, бэстибээллэр, кэнсиэртэр, быыстапка-дьаарбаҥкалар тэриллиэхтэрэ. Балаҕан ыйын 6 күнүгэр Марха 1 №-дээх оскуолатыгар стадион, балаҕан ыйын 9 күнүгэр Гагаринскай уокурукка күн батарыайатынан үлэлиир саҥа оптуобус тохтобула, ону таһынан саҥа арт-эбийиэктэр: «Московскай» сквергэ «Мин Дьокуускайы тапытыбын» ыскамыайкалар, «Арассыыйа — мин историям» историческай паарка скверигэр «Арктическай космогония», Кузьмин аатынан уулуссаҕа «Хомус» стрит-арт, Владимировка бөһ. аттыгар «Ытык сылгы үөрэ» ленд-арт арыллыахтара. ДСК саҥа эбийиэгэр тулаайах оҕолорго кыбартыыралар күлүүстэрэ туттарыллыаҕа. Ыччат уонна дьиэ кэргэн бэлиитикэтин управлениета эдэр дьоҥҥо киэҥ бырагырааманы бэлэмнээтэ.
Куорат күнүгэр, үгэс курдук, саҥа холбоспут эдэр ыаллары уонна ыал буолбуттара 50 сылын туолбут ытык ыаллары чиэстээһин, «Дьокуускай куорат олохтоохторун хараҕынан», «Мөлүйүөн сибэкки», «Тутааччылар албан ааттара» куонкурус кыайыылаахтара наҕараадаланыахтара. Быйыл аан-бастаан ыытыллар «Битва блогеров» бырайыак түмүгэ таһаарыллыаҕа. Бу туһунан киин куорат дьаһалтата иһитиннэрэр. Күндү ааҕааччылар, Куорат күнүгэр көхтөөхтүк кыттыҥ!
Раиса Сибирякова, «Саха сирэ» edersaas.ru.