Бу күннэргэ Дьокуускай куорат Дууматын 26-с уочараттаах сиэссийэтигэр киин куорат бүддьүөтүн, сири туһаныы, тутууну ыытыы уонна да атын боппуруостары көрдүлэр.
Дьокуускай куорат Дууматын бэрэссэдээтэлэ Альберт Семенов сиэссийэ билиҥҥи ирдэбилинэн санитарнай нуорманы тутуһан ыытылларын бэлиэтээн эттэ. Онон саалаҕа дьокутааттартан ураты, аҕыйах киһи муһунна. Маны таһынан, мунньахха Дьокуускай куорат баһылыгын эбээһинэһин толорооччу Евгений Григорьев кытынна.
Биир улахан боппуруоһунан ааспыт сыл бүтүүтэ, ахсынньы 23 күнүгэр, ылыныллыбыт «Дьокуускай куорат 2021 сыллааҕы уонна 2022-2023 сыллардааҕы бүддьүөтүн» бырайыагар уларытыылары киллэрии туһунан буолла. Бүддьүөт, экэниэмикэ бэлиитикэтин хамыыһыйатын бэрэссэдээтэлэ Сергей Черных туһааннаах бырайыакка көннөрүүлэри киллэрии боппуруоһун кэмитиэт мунньаҕар аҕыйах хонуктааҕыта көрбүттэрин туһунан иһитиннэрдэ.
Үп департаменын салайааччыта Ольга Максимова бүддьүөт ороскуоттаах чааһын 8 бырагырааматыгар уонна биир бырагырааманы таһынан тэрээһинигэр 289 мөлүйүөн 334 тыһыынча солкуобайынан улааппытын итиэннэ 2022 уонна 2023 сыллардааҕы бүддьүөт барылыгар ороскуот кээмэйэ 22 мөлүйүөн 879 тыһыынча солкуобайынан үрдүөҕүн туһунан иһитиннэрдэ.
Онуоха дьокутааттар ханнык бырагыраамаларга үбүлээһин кээмэйэ улааппытын чопчуластылар. Ольга Максимова олорор дьиэнэн хааччыйыы муниципальнай бырагыраамаҕа эбии 2 мөлүйүөн солкуобайтан тахса, дьарыктаах буолууну өйөөһүҥҥэ 15 мөлүйүөн солкуобай көрүллүбүтүн эттэ. Маны таһынан, куорат таһынааҕы бөһүөлэктэргэ олорор оскуола оҕолоро оптуобуһунан босхо айанныылларыгар анаан бүддьүөттэн үп-харчы тыырыллыбыт. Онон бу саҥа саҕалааһын быйылгы бүддьүөт ороскуоттаах чааһын эбэн биэрдэ.
Санатан эттэххэ, муус устар 1 күнүттэн Дьокуускай куорат таһынааҕы бөһүөлэктэргэ олорор оскуола оҕолоро оптуобуһунан босхо айанныыр буолуохтара. Билигин Дьокуускайтан Хатаска, Табаҕаҕа, Тулагыга муниципальнай оптуобуһунан айанныырга, үс киһиттэн турар дьиэ кэргэн ыйга аҕыйаҕа суох үбү-харчыны барыыр. Оскуола оҕолоро сорохтор куоракка киирэн үөрэнэллэр. Инньэ гынан, күн аайы баралларыгар-кэлэллэригэр ботуччу соҕус ороскуоттаах.
Салгыы дьокутааттар Дьокуускай куорат дьаһалтатын үлэтин сонуну киэҥник тарҕатар ситимнэргэ сырдатыыга үбүлээһин кээмэйэ тоҕо үрдээбитин уонна ханнык интэриниэт-саайтарга эбии үп-харчы көрүллүөхтээҕин туһунан ыйыталастылар.
Дьаһалта пресс-сулууспатын салайааччыта Роман Мандзяк: «Кэлиҥҥи сылларга төттөрүтүн бу салааҕа үбүлээһин кээмэйэ лаппа аҕыйаата. Ити 200 тыһыынча солкуобайынан улааппыта үрдээһининэн ааҕыллыбат. Хаһыаттары кытары үлэни күүһүрдэр былааннаахпыт. Чуолаан сахалыы тыллаах бэчээти кытары. Дьокуускай куоракка элбэх саха олорор. Онон сахалыы тыллаах хаһыаттары кытары үлэҕэ үп-харчы көрүлүннэ», – диэн быһааран биэрдэ.
Дьокутааттар сөптөөх эппиэти ыланнар, бу салааҕа сыһыаннаан эбии ыйытыылары биэрбэтилэр. Дьокуускай куоракка аҕам саастаах өттө сахалыы тылынан тахсар таһаарыылары хото ааҕар. Онон куорат үлэтин-хамнаһын төрөөбүт тылбытынан суруйар, быһааран биэрэр туох куһаҕаннаах буолуой.
Түмүккэ, бүддьүөт бырайыагар уларытыы киллэрии боппуруоһун дьокутааттар ылыннылар. Маны таһынан, улахан туох да мөккүөрэ суох, «Сири туһаныы уонна Дьокуускай куоракка тутууну ыытыы быраабылалара», «Дьокуускай куорат муниципальнай бас билиитигэр сылдьар эбийиэктэригэр рекламнай конструкциялары туруоруу бэрээдэгэ» нуормалыыр быраап актарыгар уларытыылары киллэрии боппуруостарын иһин дьокутааттар 100 бырыһыан куоластаатылар.
Оттон биллиилээх дьон олорбут дьиэлэрин таһыгар өйдөбүнньүк суруктары ыйааһын боппуруоһун тула үгүс дьүүллэһии, кэпсэтии таҕыста. Ол курдук, сиэссийэ бэбиэскэтигэр Федор Донскойга, Иннокентий Пахомовка, Айаал Степановка аналлаах бэлиэлэри туруоруу туһунан боппуруостар киллэриллибиттэр. Сорох дьокутааттар бу өйдөбүнньүк суруктар биир кэлим халыыпка эппиэттээбэттэрин ыйдылар.
ССРС ИДьМ үтүөлээх үлэһитэ, СӨ ис дьыала миниистирин солбуйааччытынан үлэлээбит, РФ Ис дьыала министиэристибэтин юридическай институтун филиалын Дьокуускай куоракка төрүттээбит Федор Донской өйдөбүнньүк суругун туруорууга көҕүлээччинэн Ис дьыала министиэристибэтэ буолар. Бэлиэни Петр Алексеев аатынан уулусса 5-с нүөмэрдээх дьиэтин таһыгар ыйыыр былааннаахтар.
edersaas.ru
Хаартыска http://yktgorduma.ru