Киин куоракка ыт ииригирэн ыарыытын хамыыһыйа хонтуруолга тутар
Бырабыыталыстыба бэрэссэдээтэлин солбуйааччы Денис Белозеров бырабыыталыстыба иһинэн тэриллибит сыстыганнаах ыарыылары утары үлэни тэрийэр хамыыһыйа сүбэ мунньаҕын салайан ыытта.
edersaas.ru
Сүбэ мунньахха хамыыһыйа чилиэннэрин таһынан “Жилкомсервис” МУТ дириэктэрэ Валерия Билоус, “Дьокуускай куорат” куораттааҕы уокурук баһылыгын ОДьКХ боппуруостарыгар солбуйааччы Роман Сорокин, куораттааҕы бэтэринээрийэ управлениетын начальнига Павел Павлов уонна “Жатай” куораттааҕы уокурук баһылыгын бастакы солбуйааччы кыттыыны ыллылар.
Бэбиэскэҕэ ыттар ииригирэн ыалдьыыларын (бешенство) түбэлтэтин боппуруоһа туруорулунна. Сүрүн иһитиннэриини оҥорбут Бэтэринээрийэ департаменын салайааччы Василий Бураев бэйдиэ сылдьар ыттары көрөр-истэр пууҥҥа чахчы ыт ииригирэн ыарыыта тахсыбытын этэ. Итиэннэ кутталлаах ыарыы тарҕамматын туһугар ыытыллар үлэни-хамнаһы билиһиннэрдэ. Бэйдиэ сылдьар ыттары тутар уонна олору мунньан көрөр-истэр пууҥҥа үлэлиир дьоҥҥо бу ыт ыарыы вируһа суоһаабатын тэрийиигэ ыыттылар үлэ туһунан Роспотребнадзор Саха сиринээҕи салаатын кэтээн көрүүгэ отделын начальнига Валентина Григорьева сырдатта. Куорат сирдэргэ ыарыыны сүрүн тарҕатааччынан кэрбээччилэр, кырыысалар, кутуйахтар буолалларын бэлиэтээн туран, ыскылааттары о.д.а. дератизациялааһыны күүһүрдэргэ, «ЖилкомСервис» харантыыҥҥа хабыллыбыт зонаҕа үлэтин мөлтөппөтүгэр эттэ.
Сүбэ мунньах түмүгүнэн, ыт уонна сүөһү өлүктэрин санитарнай-бэтэринээринэй ирдэбилгэ сөп түбэһиннэрэн дьаһайарга, нэһилиэнньэҕэ өйдөтөр-сырдатар үлэни күүһүрдэргэ, сыстыганнаах ыарыыны утары охсуһуу былаанын халбаҥнаабака тутуһарга итиэннэ балаһыанньаны күннэтэ Бырабыыталыстыбаҕа иһитиннэрэн иһэргэ уураах ылылынна.
Раиса Сибирякова, «Саха сирэ» хаһыат, edersaas.ru