Ааспыт нэдиэлэҕэ Дьокуускай куоракка уонна сорох улуустарга күүстээх тыал түһэн, олохтоохтортон уот арахсыытынан элбэх сайаапка киирбитэ.
«Якутскэнерго» ПАУо Киин электрическэй ситимнэрэ 0,4 кВ уот ситимин чөлүгэр түһэрии үлэлэрин салгыы ыыталлар. Бүгүн, балаҕан ыйын 12 күнүгэр, 36 киһилээх 9 биригээдэ уонна 16 техника чөлүгэр түһэриигэ үлэлиир. 12 чаастааҕы туругунан, электричество уота суоҕун туһунан 22 сайаапка нэһилиэнньэттэн киирбит.
Суһал-диспетчерскай бөлөххө Дьокуускай куораттан уонна куорат таһынааҕы нэһилиэнньэлээх пууннартан балаҕан ыйын 8 күнүттэн уопсайа 482 сайаапка киирбит. Мантан 223 сайаапканан үлэ ыытыллыбыт. Үлэ күнүстэри-түүннэри ыытыллар. Бу туһунан Киин электрическэй ситимнэр Киин оройуонун начаалынньыга Алексей Березовскай иһитиннэрдэ. Үлэни суһаллык ыытар туһуттан Покровскайдааҕы уонна Намнааҕы РЭС үлэһиттэрэ көмөҕө кэлбиттэр.
«Күн бүгүнүгэр диэри куорат араас оройуоннарыттан сайаапкалар киирэ тураллар. Үлэ түргэнник барыытын харгыстаһар түгэннэр элбэхтэр. Холобур, чааһынай территорияҕа уонна харыстанар зонаҕа баар учаастактарга уот ситимнэрэ турар буоланнар, үлэ бытаарар», — диэн Киин электрическэй ситимнэр Киин оройуонун начаалынньыга Алексей Березовскай эбэн эттэ.
Санатан эттэххэ, аны былааннаммыт өрөмүөн үлэлэрэ ыытыллаллар. Онон, сорох күннэргэ уот арахсыыта син биир тахса турар. Бу ссылканан киирэн уот быстах кэмҥэ арахсыытын кыраапыгын көрүҥ https://yakutskenergo.ru/About_company/press-center/news-in-detail.php?ELEMENT_ID=36092286