Бэҕэһээ социальнай ситимнэринэн Дьокуускайга тайах дьаарбайа сылдьарын туһунан иһитиннэрии тарҕаммыта.
edersaas.ru
Экология, айылҕаны туһаныы уонна ойуур хаһаайыстыбатын министиэристибэтин үлэһииттэрэ РНА Сибиирдээҕи салаатын Криолитозона биологическай таһаарыыларыгар институтун үлэһиттэрин кытары иһитиннэриини тутаат да, тайаҕы тутарга туруммуттара.
Хара тыа маанылаах кыыла куоракка, Дьокуускайдааҕы килиэп кэмбинээтин түөлбэтигэр, «Тако» ХЭУо базатыгар, киирбит. Бу эргин бэрт элбэх массыына сылдьарынан, тайаҕы тыаҕа үүрэн таһаарар кыаллыбат эбит. Ол иһин, укуол биэрэн утутан баран, таһаҕас таһар массыынаҕа тиэйдилэр. Куораттааҕы бэтэринээрийэ управлениетын исписэлииһэ тайах уопсай туругун көрбүтүн-истибин кэнниттэн, куорат таһыгар таһааран, тыаҕа, бэйэтин үөскээбит эйгэтигэр ыыттылар.
Бу үлэни Биоресурсалар дириэксийэлэрин салайааччы Егор Антонов уонна экологияны кэтээн көрүү Дьокуускайдааҕы судаарыстыбаннай кэмитиэтин бэрэссэдээтэлэ Кирилл Алчин тэрийэн дьаһайдылар. Биһиги үтүө дьыалаҕа кыттыбыт дьоҥҥо, чуолаан «Якуткерамика» ХЭУо дириэктэрэ Александр Коционовка махтанабыт диэн Экология, айылҕаны туһаныы уонна ойуур хаһаайыстыбатын министиэристибэтин пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru