Киин эрэгийиэннэргэ сөптөөх уларытыылар киирбиттэр

Ааптар: 
Бөлөххө киир:

Тыа хаһаайыстыбатыгар сыһыаннаах боппуруос Судаарыстыбаннай Дуумаҕа көрүллүбүт.

Бастакы ааҕыыга тыа хаһаайыстыбатын сириттэн учаастактары тутан ылыыны судургутутар туһунан сокуон барыла ылыллыбытын туһунан  @dumabrief суруйар.  Судаарыстыбаннай Дуума аграрнай боппуруостарга кэмитиэтин бэрэссэдээтэлин солбуйааччы Надежда Школкина бэлиэтииринэн, ылыныллыбыт сокуон барылыгар аналынан туһаныллыбатах тыа хаһаайыстыбатын сирин бигэргэтии болдьоҕо кыччыыр, ону тэҥэ маннык дьыалалары суукка көрүү болдьоҕо эмиэ.

Бу бастакы ааҕыыга ылыныллыбыт сокуон барылын туһунан СӨ Судаарыстыбаннай Мунньаҕын (Ил Түмэн) дьокутаата, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин маннык санаатын үллэһиннэ:

— Сокуон барыла бастакы ааҕыыны ааста, ол аата 2-ис ааҕыыга киириэр диэри этиилэр, уларытыылар баар буолуохтара. Мин көрдөхпүнэ, ордук киин эрэгийиэннэргэ туһуланар уларытыылар киирбиттэр: элбэх иэннээх сирдэрдээх, ол сирдэринэн мэктиэлээн, солуок ууран улахан суумалаах кирэдьииттэри ылар, эргинэр, эбэтэр ити сирдэрин ыарахан сыанаҕа атыылыыр чааһынай тэрилтэлэргэ. Итинэн туһанан араас сокуоннайа суох хамсаныылары таһаарбаттарын туһугар, сокуоҥҥа хааччахтыыр, хонтуруоллуур ирдэбиллэр эбиллэн, күүһүрдүллэн биэрбиттэр.

Биһиэхэ «кыһалҕа» арыый атын: улахан тыа хаһаайыстыбатын тэрилтэлэрэ сирдэрэ онто да суох кырыымчык, онон кинилэргэ туһаныллыбат сир да диэн суоҕун кэриэтэ. Төттөрүтүн урукку совхоз саҕаттан быраҕыллыбыт оһорбо сирдэри чөлүгэр түһэрэргэ үлэлэһэллэр. Онтон чааһынай сирдээх дьон сааһыран сүөһү көрбөт, ходуһаларын бэйэлэрэ оттообот түгэннэрэ кэлин сылларга эбиллэн иһэр. Дьэ, бу хайысхаҕа болҕомтобутун ууруохтаахпыт: ити дьонтон сирдэрин сокуоҥҥа сөп түбэһиннэрэн ылан, чахчы үлэлиэн, туһаныан, дьарыктаныан баҕалаахтарга сыһыарыы. Кадастровай сыананан атыылаһан ылыы систиэмэтин тэрийэ иликпитинэ, кыаллыа суоҕа. Оттон Федеральнай сокуон этэринэн, үс сыл устата туһамматаҕын бэрэбиэркэлээн, аактаан, «хара испииһэк» реестригэр киллэрэн суутунан былдьааһын биһиги өрөспүүбүлүкэбитигэр табыгаһа суох курдук.

Бэлэмнээтэ Женни Стрюкова

Хаартыскаҕа: А.М.Находкин

+1
0
+1
0
+1
0
+1
0
+1
0
+1
0
+1
0