Быыбар күнүгэр Киин быыбардыыр хамыыһыйа сайтын 15 дойдуттан куолаан атаакалаабыттар. Бу туһунан Киин быыбардыыр хамыыһыйа (ЦИК) бэрэссэдээтэлэ Элла Памфилова иһитиннэрдэ.
Күүстээх DdoS атаака кулун тутар 18 күнэ үүнэр түүнүгэр 2 чааһы ааһыыта саҕаламмыт уонна 5 чааска диэри салҕаммыт. Ону таһынан, хас даҕаны көрдөрөр-иһитиннэрэр сириэстибэлэр сайтарын эмиэ атаакалаабыттар. Ол курдук субуотаҕа “Лента.Ру” онлайн-таһаарыы уонна Роскомнадзор сайтарын алдьаппыттар. Ол эрээри, аҕыйах чааһынан сайтары оҥорбуттар.
Хакердар Киин быыбардыыр хамыыһыйа иһитиннэрэр-ыйар киинин да тумнубатахтар. Бу күн кинилэрэ да суох ноҕурууска хас да төгүл улааппыт. Бу кииҥҥэ дьон үксүгэр: “Мин ханна куоластыыбыный?” диэн ыйытаары эрийэллэр эбит. Онон ЦИК сорох регионнар быыбардааччыларга толору информацияны ситэ тиэрдибэтэхтэр диэн бэрэбиэркэ оҥороору гынар.
Ангелина Васильева, “Саха сирэ” хаһыат, edersaas.ru