Арассыыйаҕа арыгы биир киһиэхэ тиксиитин орто кээмэйэ, 2009 сылы кытары тэҥнээтэххэ, 1,5 төгүл аҕыйаата. Экспертэр сыаналыылларынан, биир киһиэхэ сылга 10-тан тахса лиитирэ тиксэр (2009 с. – 15 лиитирэ этэ). Доруобуйа харыстабылын Бүтүн аан дойдутааҕы тэрилтэтин ирдэбилинэн, бу нуорма өссө 8 лиитирэҕэ диэри түһэриллиэхтээх.
Надежда ЕГОРОВА, «Саха сирэ» хаһыат, edersaas.ru
Онуоха арыгылаах бородууксуйанан эргиниини, нэһилиэнньэ аһыы утаҕынан үлүһүйүүтүн уо.д.а. куһаҕан дьаллыктары утары охсуһар тэрилтэлэр үлэлэрэ уонна уопсастыбаннас кыттыһыыта улахан суолталаахтар. Соторутааҕыта СӨ Госалкогольконтроль управлениета (сал. Матвей Лыткин) уонна «Саха сирэ арыгылааһыны утары» өрөспүүбүлүкэтээҕи уопсастыбаннай хамсааһын (сал. Нарыяна Гаврильева) бииргэ үлэлииргэ сөбүлэһии түһэристилэр.
Өрүттэр социальнай суолталаах бырайыактары олоххо киллэриэхтэрэ, чөл олох, арыгы буортутун туһунан социальнай рекламалары, видеороликтары оҥоруохтара.
Сөбүлэһии чэрчитинэн, тохсунньуга «ЗОЖ» уопсастыбаннай фонда дириэктэрэ Елена Шудря уонна Дьокуускайдааҕы медицинскэй колледж преподавателэ, спортивнай быраас Валентина Комиссарова Бүлүү куорат нэһилиэнньэтигэр, ол иһигэр Бүлүүтээҕи педагогическай колледжка, лиэксийэлэри аахтылар. Арыгыны уонна психоактивнай бэссэстибэлэри туһаныыны сэрэтии ньымаларын туһунан туһалаах лиэксийэлэргэ 60-ча киһи сырытта.
Надежда ЕГОРОВА, «Саха сирэ» хаһыат, edersaas.ru