Сураҕа суох сүппүт дьону көрдөөһүн — полиция үлэтин сүрүн хайысхаларыттан биирдэстэрэ. Улахан да киһи, оҕо да сүтүүтэ сырыы аайы долгуйууну, ол-бу бөрүкүтэ суох сабаҕалааһыны үөскэтэр, суһал быһаарыыны эрэйэр.
Маныаха полиция бэлиэтииринэн, «сүтээччилэр», сүрүннээн, 40-гар диэри саастаах дьон. Үксүгэр, олоххо оттомо суохтук сыһыаннаһалларыттан, көрү-нары, күүлэйи батыһалларыттан итинник тахсар. Сол курдук дьиэлэриттэн тахсан бардылар да, ууга тааһы бырахпыттыы сүтэн хаалаллар. Саатар дьонноругар эрийэн, ханна баалларын, сылдьалларын биллэрбэттэр эбит.
Бу күннэргэ оннук «сүппүт» дьону Дьокуускай куорат полициятын оперативниктара булбуттарын туһунан СӨ ИДьМ-тын пресс-сулууспата иһитиннэрдэ. Олортон иккитэ — сокуоннай саастарын ситэ илик оҕолор.
Ол курдук, тохсунньу 2 күнүгэр 29 саастаах дьахтар дьиэтиттэн тахсан баран, нэдиэлэ устатыгар сүтэн хаалбытыгар, дьоно полицияҕа сайабылыанньа суруйбуттар. Бу дьахтары дьүөгэтигэр хоно-өрүү сытарын булбуттар.
Тыаттан киин куоракка көрдөрүнэ-эмтэнэ киирбит 69 саастаах киһи икки нэдиэлэни быһа сүппүтүн булбуттар.
Оттон Дьокуускай аттынааҕы бөһүөлэк 30 саастаах олохтооҕо Саҥа дьылы бэлиэтээн баран, куоракка киирэн аҕыс күнү быһа сүтэн хаалбытын, табаарыһын дьиэтиттэн булбуттар.
Тохсунньу 4 күнүгэр, төрөөбүт күнүн саҕана, 19 саастаах инбэлиит кыыс эмиэ дьиэтиттэн тахсан баран, таһы-быһа сүтэн хаалбыт. Дьоно ыксааннар, полицияҕа тыллаабыттар. Онтулара доҕор уолугар баар эбит.
17 саастаах уолу икки нэдиэлэни быһа көрдөөбүттэрэ, атаһын дьиэтиттэн көстүбүт.
16 саастаах кыыс эмиэ нэдиэлэни быһа сүппүтүн, дьүөгэтигэр олорорун булбуттар.
Полиция «сүтэн хаалар» дьонтон көрдөһөр: убаастабыллаах гражданнар, бука диэн, чугас дьоҥҥутугар болҕомтолоох буолуҥ. Сүтүктээбэттэрин туһугар, ханна туохха бараргытын-кэлэргитин этэ-кэпсии сылдьыҥ, төлөпүөнүнэн эрийэн сэрэтэр туох да ыарахана суох эбээт.
Оттон сүтэрбит дьоҥҥо анаан: өскөтүн чугас киһиҥ сүттэҕинэ, олорор сириҥ Ис дьыалаҕа отделыгар кэлэн, бэйэҥ докумуоҥҥун көрдөрөҕүн уонна сүппүт киһини туоһулуур докумуоннары аҕалаҕын.
Маныаха бу киһи тас көрүҥүн сиһилии, үчүгэйдик ойуулаан биэриэхтээххин, хаартыскатын илдьэ кэлиэхтээххин. Тугунан дьарыктанарын, майгытын-сигилитин, сыһыаҥҥытын, кимнээҕи кытта алтыһарын, ханна тиийиэн сөбүн — быһата, кини туһунан тугу билэргитин барытын ыраас мууска ууран биэрэҕит.
Быраабы араҥаччылыыр уорганнарга төһөнөн түргэнник биллэрэҕит да, сүппүт киһини көрдөөһүн соччонон суһаллык саҕаланар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.