Сир-дойду, чахчы, дьонунан киэркэйэр. «Дьаҥхаады дьоно» сиэрийэ 13-с кинигэтэ бэчээттэнэн таҕыста. Бу Мэҥэ-Хаҥалас дьонугар-сэргэтигэр биир туһунан үөрүү-көтүү буолла. Кинигэни билиһиннэрии үөрүүлээх тэрээһинин туһунан биһиэхэ Майаттан «Таммахтар» литературнай түмсүүнү салайар Августина Хабарова иһитиннэрдэ.
— Дьаҥхаады нэһилиэгиттэн төрүттээх, хара үлэттэн илиитин араарбатах чулуу тырахтарыыс, спортсмен бэртээхэйэ, булчут, балыксыт ааттааҕа, иллээх дьиэ кэргэн аҕа баһылыга, тапталлаах кэргэн, үгүс киһи үтүөкэн доҕоро-атаһа, майгылаах мааныта, көрүҥнээх бастыҥа, дьоҥҥо-сэргэҕэ сулус курдук чаҕылхайдык тырымнаан үтүө өйдөбүлү хаалларан ааспыт саха саарына Симафор Иннокентьевич Игнатьев туһунан кинигэ күн сирин көрдө.
ХИФУ кинигэ кыһатын дириэктэрэ, РФ анал үрдүк үөрэхтээһинин кыһатын Бочуоттаах үлэһитэ Валентина Михайловна Слепцова быһаччы кыттыытынан, Симофор Иннокентьевич кэргэнэ Альбина Ивановна сүүрэн-көтөн, дьону көҕүлээн, оҕолорун, чугас аймах-билэ дьоннорун өйөбүллэринэн бу дьоһун кинигэ таҕыста.
Долгутуулаах тэрээһин, кинигэ сүрэхтэниитэ дойдубутугар саха балаҕаныгар бэрт сылаас, истиҥ быһыыга-майгыга ыытылынна. Кинигэ сүрэхтэниитигэр аал уоту музей үлэһитэ, СӨ Култууратын үтүөлээх үлэһитэ Нина Федоровна Колосова уохтаах кымыһынан, арыылаах алаадьынан айах тутта, алгыс баһын сыалаата. Истиҥ тэрээһини бибилэтиэкэр Раиса Пантелеймоновна Андросова иилээн-саҕалаан ыытта.
Сэһэргэһиигэ Альбина Ивановна оскуолаҕа бииргэ үөрэммит табаарыстара кэлэн киһи эрэ кэрэхсээн истэр ахтыыларын оҥордулар. Омуннаах оҕо саас, эдэрдэр маҥнай ыал буолбут түгэннэриттэн урукку өртүгэр иһиллибэтэхтэри, ким да билбэтин, көрдөөх-күлүүлээх түгэннэри өйдөөн-санаан кэпсээбиттэрэ олус интэриэһинэй буолла, болҕомтону тарта. Аймахтара, чугас доҕотторо эмиэ олус истиҥник ахтан-санаан аһардылар. Симофор Иннокентьевич үөрэҕэ суох буолан, оҕолоро үрдүк үөрэхтээх, дьоҥҥо сирдэрбэт үлэһит буолуохтарын олус баҕарарын, ол ыра санаата туолан, Игнатьевтар оҕолоро талан ылбыт идэлэринэн бэриниилээхтик уонна үрдүк таһаарыылаахтык үлэлии-хамсыы сылдьалларын кэпсээбиттэрэ үөрүү долгунугар уйдаран ытыс тыаһынан доҕуһуолланна. Оҕолор билигин бэйэлэрэ туспа ыаллар. Ийэ, аҕа буолан быр-бааччы олороллор.
Бу долгутуулаах, үөрүүлээх тэрээһиҥҥэ “Бочуот знага” уордьан кавалера Михаил Петрович Алексеев, кини кэргэнэ, өрөспүүбүлүкэ чөмпүйүөн оҕуруотчута, “Үлэҕэ килбиэнин иһин” мэтээл хаһаайката Елена Николаевна, Дьаҥхаады нэһилиэгин бочуоттаах гражданина Дмитрий Константинович Жирков, РСФСР култууратын туйгуна Прасковья Саввична Говорова, ССРС үөрэҕириитин туйгуна Н.Ф.Колосова, РСФСР үөрэҕириитин туйгуна Розалия Герасимовна Захарова, комсомол лиидэрэ, бииргэ бултуур доҕоро Нестер Гаврильевич Ефимов, Павел Петрович, Елена Гаврильевна Шариннар, аймахтара Антонина Петровна, Владимир Петрович Аргуновтар, норуот маастара Валентина Васильевна Попова, ИДьМ туйгуна Илья Алексеевич Тарабукин, РФ доруобуйа харыстабылын туйгуна Наталья Алексеевна Стручкова, СӨ култууратын туйгуна Тамара Михайловна Винокурова, РСФСР үөрэҕириитин туйгуннара Иван Ипатьевич Ермолаев, Лука Гаврильевич Никифоров, СӨ үөрэҕириитин туйгуннара Валентина Николаевна Кирсанова, Валентина Николаевна Дмитриева, Татьяна Петровна Ларионова, Дьаҥхаады бочуоттаах гражданина Мария Семеновна Владимирова, уо.д.а. кытыннылар.
Ахтыы кинигэ биир сүрүн уратытынан, Альбина Ивановна отучча сирэйгэ Төхтүргэ эн-мин дэһэн олорбут аймах-билэ, доҕор-атас, бииргэ үлэлээн ааспыт дьонун, чугас ыалларын тустарынан оҕолоруттан сиэннэригэр тиийэ ааттарын ааттаан сиһилии суруйбута буолла. Ол эбэтэр, бу кинигэҕэ биир эрэ киһи туһунан буолбакка, бүтүн нэһилиэк дьонун-сэргэтин, ыаллыылар сыһыаннарыгар, бэйэ-бэйэни өйөһүүлэригэр тиийэ киллэриллэн, нэһилиэк устуоруйатын биир кэрчик кэмэ сурукка тиһиллэн киирбит. Бу кэлэр көлүөнэҕэ аймахтарын туһунан үтүө өйдөбүлү иҥэрэр, иитэр-үөрэтэр суолталаах бэртээхэй кинигэ буолбут диэн дьон-сэргэ олус астынна, үөрдэ.
