“Дьиэҕэ олор” акция чэрчитинэн инстаграм страницатыгар, ватсап ситиминэн, о.д.а. көрүҥнэринэн, дьон интэриэстэринэн түмсэн, араас куонкурустары, көрүүлэри, маастар-кылаастары ыыталлар, быыстапкалары тэрийэллэр.
Холобур, хаартыскаҕа түһэриинэн дьарыктанар Александр Петров 2014 сыллаахха биир санаалаахтарын түмэн, “Фотомастер” диэн хаартыскаҕа түhэриинэн үлүhүйэр, хаартысканы сэҥээрэр дьон бөлөҕүн тэрийбитэ. Бу бөлөххө өрөспүүбүлүкэ араас улуустарыттан араас идэлээх дьон түмсэн, хаартыскаҕа түhэрии уустук идэтигэр уhуйуллар эбит. Александр бэйэтэ маастар-кылаас биэрэн ииппит уhуйбут үөрэнээччилэрэ билигин бөлөҕү сүрүннүүллэр.
Быйыл бу коронавирус харантыынын кэмигэр дьиэҕэ олорор кэмҥэ “Фотомастер” бөлөх инстаграмынан хаартыска куонкуруһун ыытта.
—Куонкурус сүрүн сыала – бу самоизоляцияҕа олорон, араас улуустартан кэлбит кэрэ түгэннээх хаартыскалары дьон көрөн үөрдүн, санаата көнньүөрдүн, сэргэхсийдин, бэйэлэрэ эмиэ хаартыскаҕа түһэриэхтэрин баҕардыннар, диэн ыыттыбыт, — дэһэллэр тэрийээччилэр.
Бөлөҕү, куонкуруһу сүрүннээччилэринэн Зямбеда Айанитова-Айаана, Анатолий Макаров, Ольга Бережнова буолаллар. Кинилэр кылгас кэмҥэ улахан тэрээһин үлэни ыытаннар, Саха сирин үгүс улуустарын хабар, икки номинациянан киэҥ күрэхтэһии буолла. Фото-куонкуруска 123 кыттааччыттан уопсайа 327 үлэ киирбит.
Бу күннэргэ түмүк таҕыста. 16 киһилээх дьүүллүүр сүбэ саамай элбэх баалын ылбыт үлэ хаһаайына супер-бирииһи (худуоһунньук Сууралдьыма хартыыната) ылбытын бэлиэтиир наадалаах. Итиэннэ, инстаграм сурутааччылара, ааҕааччылара бэйэлэрэ куоластаан быһаарыыларыгар “Көрөөччүлэр биһирэбиллэрэ” анал бириис олохтоммут. Манна даҕатан эттэххэ, бириистэри барытын “Фотомастер” бөлөххө дьарыктанааччылар бэйэлэрэ туруорбуттар.
Дьэ онон, номинацияларынан кыайыылаахтары билсиэҕиҥ:
“Сайыҥҥы мүөттээх салгын”
I м. Гавриил Петров “Сарсыарда”. Нам улууһа.
II м. Николай Никонов “Сайылыкка”. Мэҥэ-Хаҥалас. Хочо.
III м. Айталина Андреева. Дьокуускай к.
“Кэрэ түгэн”
I м. Паша Варламова “Мои года…”. Дьокуускай к.
II м. Любовь Мыреева “Доҕордоһуу үҥкүүтэ”. Ленскэй к.
III м. Анатолий Макаров “Үөһээ айыыларга аартык ситимэ”
Чурапчы.
Супер-бириис
Руслан Алексеев “Миллион вольт с небес” 11-с кылаас үөрэнээччитэ. Сунтаар.
Көрөөччүлэр биһирэбиллэрэ (1421 лайк)
Мичийээнэ Барашкова, устудьуон. Чурапчы улууһа. Одьулуун.
*Санаа
“Ыра санаа ыллыга”
—Чахчы үчүгэй, дьоһуннаах үлэлэр кыайыылаах таҕыстылар, бэлиэтэннилэр. Мин сүрүн бириискэ туруорбут үлэм «ЫРА САНАА ЫЛЛЫГА» диэн. Бу куонкурус кэмигэр суруйдум.
Ханнык баҕарар киhи ыра санаалаах, ол сороҕор туолар, оттон ардыгар туолбат курдук буолуон эмиэ сөп. Ол да буоллар, киhи биир дьикти айылгыта — ДЬОЛГО, КЭРЭҔЭ дьулуhуу. Ол саамай улахан, күүстээх мотивация буолар уонна ханнык да мэhэйдэри туоруур, — диэн санаатын үллэстэр супер-бирииһи туруорбут худуоһунньук Александра Бочкарева-Сууралдьыма.
Куонкуруска киирбит үлэлэри инстаграм страницата photomaster_ykt көрүөххүтүн сөп.
Сүрүн хаартыскаҕа: А.Бочкарева-Иннокентьева-СУУРАЛДЬЫМА. «Ыра санаа ыллыга» (холст. масло 30х50) 2020 с.
Татьяна МАРКОВА.