Быйыл күһүн СӨ Киһи быраабыгар боломуочунайынан анаммыт Сардана Гурьева Дьокуускай куорат 1 №-дээх кытаанах эрэсиимнээх холуонньа үлэтин билсэ-көрө киирэ сылдьыбытын туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
Омбудсмены холуонньаҕа РФ Накаастабылы толорор федеральнай сулууспатын Саха сиринээҕи управлениетын начальнига Владислав Дзюба, начальнигы солбуйааччы Владимир Узлов, начальник киһи быраабыгар көмөлөһөөччүтэ Анастасия Потапова, холуонньаларга сокуоннаһы тутуһууну хонтуруоллуур борокуруор Денис Пуляевскай уонна бу холуонньа салалтата арыаллаатылар.
Киһи быраабыгар боломуочунай холуонньа сүрүн эбийиэктэригэр — дьуһуурунай чааска, остолобуойга, библиотекаҕа, медико-санитарнай чааска, хаайыылаахтар олорор этэрээттэригэр (уопсай дьиэлэргэ) сырытта.
Сүрүннээн, буруйдарын боруостааччылары аһынан-үөлүнэн хааччыйыы, доруобуйаларын туругун бэрэбиэркэлээһин боппуруостарын, туһалаах дьарыктаах буолууларын, библиотекаҕа сибиэһэй хаһыат төһө кэлэрин интэриэһиргээтэ. Онно барытыгар толору хоруйдары ылан истэ.
Холобура, аныгылыы флюорографическай оборудование, соннук стоматологическай кабинет баарын, наадалаах эмп-том кэмигэр аҕалылларын, онтон библиотекаҕа хаһыат эрэ буолбакка, уус-уран, документальнай уонна юридическай литература эмиэ киирэ турарын туһунан.
Маны таһынан, боломуочунайга аныгы сибээс систиэмэтин — IP-телефония — хайдах үлэлиирин көрдөрдүлэр.
Салгыы Сардана Гурьева уонна Денис Пуляевскай хаайыылаахтары кытта биирдиилээн көрүстүлэр, онно биир да үҥсүү киирбэтэ.
Оробуочай сырыыны түмүктүүр мунньахха накаастабылы толорор уорганнар уонна Киһи быраабыгар боломуочунай салгыы бииргэ үлэлэһэр былааннарын ырытыстылар.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.