Киһи быраабыгар боломуочунай Алексей Ефимов уопута атыттарга тарҕаныаҕа

Бу дьыл кулун тутар 16-17 күннэригэр Сочи куоракка киһи быраабын көмүскүүр боломуочунайдар муһуннулар.

Вера МАКАРОВА, «Саха сирэ» хаһыат, edersaas.ru 

Бу социальнай быраабы көмүскээһиҥҥэ анаммыт улахан «төгүрүк остуолга» биһиги өрөспүүбүлүкэбит Киһи быраабыгар боломуочунайа Алексей Ефимов эмиэ кытынна. Тэрийээччилэр — РФ Киһи быраабыгар боломуочунайа уонна Европа Сэбиэтэ.

Маннык үрдүк таһымнаах тэрээһиҥҥэ дойду араас муннугуттан 33 боломуочунайы таһынан, Киһи быраабыгар Европа суутун, ХНТ, РФ Тас дьыалаларга министиэристибэтин итиэннэ РФ Юстицияҕа министиэристибэтин бэрэстэбиитэллэрэ, юриспруденция эйгэтигэр биллэр учуонайдар уо.д.а түмүстүлэр.

СӨ Киһи быраабыгар боломуочунайа Алексей Ефимов бу форумҥа көхтөөхтүк кыттан, өрөспүүбүлүкэҕэ гражданнар кэһиллибит социальнай бырааптарын хайдах туруулаһан ситиһэллэрин туһунан дакылаат аахта.

Алексей Михайлович бу дакылаатын «төгүрүк остуол» кыттыылаахтара бэркэ сэргээн истэн биһирээбиттэр. Чуолаан, биһиги боломуочунайбыт үлэтигэр  биллиилээх учуонай, норуоттар икки ардыларынааҕы быраап исписэлииһэ, ХНТ кэмитиэтин чилиэнэ, профессор Аслан Абашидзе үрдүк сыанабылы биэрдэ. Кини саха омбудсменын дакылаатын юридическай өттүнэн чуолкайын, киһиэхэ көмөлөһүү чопчу холобурдарыгар олоҕурбута туһалааҕын бэлиэтээтэ.

Итинтэн сиэттэрэн, СӨ Киһи быраабыгар боломуочунайын уопутун атын регионнарга үтүө холобур быһыытынан тарҕатарга диэн федеральнай аппараат салалтата быһаарбыт.

Бу туһунан биһиги сайтпытыгар СӨ Киһи быраабыгар боломуочунайын уонна кини аппараатын пресс-сулууспата иһитиннэрдэ.

Вера МАКАРОВА, «Саха сирэ» хаһыат, edersaas.ru