Ньурба улууһун Хорула нэһилиэгэ 400-тэн тахса быыбардааччылаах. Манна олохтоох дьаһалта салалтатынан учаастактааҕы быыбардыыр хамыыһыйа тэриллэн, дойду Төрүт Сокуонугар уларытыылары киллэриигэ ыытыллыахтаах быыбарга бары тэрээһиннэри эрдэттэн бэлэмнээбит, онон бэс ыйын 25 күнүттэн болдьоҕун иннинэ куоластааһыны ыыта олорор.
Хорула нэһилиэгин учаастактааҕы быыбардыыр хамыыһыйатын бэрэссэдээтэлин солбуйааччы Александра Николаева иһитиннэрэринэн, улуус кииниттэн 120 км ыраах олорор нэһилиэккэ 400-тэн тахса быыбардааччы баарыттан иллэрээ күн 100, бэҕэһээ 64 быыбардааччы дьиэҕэ уонна учаастакка куоластаабыттар.
Бэҕэһээ, бэс ыйын 26 күнүгэр, 64 киһи куоластаабытыттан 22-тэ дьиэтигэр ыҥыран мобильнай уурунаҕа уган куоластаата, 42 быыбардааччы учаастакка кэлэн куоластаата.«Биһиги нэһилиэккэ дьон-сэргэ куоластааһыҥҥа кыттыыта хара маҥнайгыттан көхтөөхтүк саҕаланна. Маннык тэтиминэн буоллаҕына, от ыйын 1 күнүгэр тиийбэккэ, нэһилиэк куоластааһыны эрдэ түмүктүөн сөп курдук», — диир Александра Анатольевна.
Нэһилиэк баһылыга Василий Николаевич Семенов бэлиэтииринэн, быыбардыыр учаастакка пандемияттан көмүскэнэр бары ирдэниллэр санитарнай-профилактическай миэрэлэр ылыллыбыттар, нэһилиэнньэ ортотугар сырдатар, сэрэтэр үлэ эрдэ ыытыллыбыт. Ол курдук антисептиктэр, учаастакка температураны кээмэйдиир мэдиссиинискэй үлэһиттэр, биирдэ туттуллар уруучукалар о.д.а. барыта баар.
Төһө да улуус кииниттэн ыраах олордоллор, Хорула нэһилиэгин быыбардааччылара учаастакка тус бэйэлэринэн кэлэн эбэтэр кыайан кэлэр кыаҕа суох өттө дьиэлэригэр мобильнай уурунаны аҕалтаран, дойдубут Төрүт Сокуонугар уларытыылары киллэриигэ тус санааларын этэр куоластааһыҥҥа көхтөөхтүк кытта сылдьаллар.
edersaas.ru