Быйыл өрөспүүбүлүкэҕэ үбүлүөйүнэн баай сыл. Ол курдук, өрөспүүбүлүкэни аһынан-үөлүнэн, туттар табаарынан хааччыйан кэлбит “Холбос” респотребсоюз тэриллибитэ 100 сылын бэлиэтиир.
“Холбос” сэбиэтин бэрэссэдээтэлэ Петр Мишкин этэринэн, ахсынньы 20-21 күннэригэр Дьокуускайга үбүлүөйдээх тэрээһин ыытыллыаҕа. Бастакы күн Дьокуускайдааҕы потребкооперация эргиэн-экономическай коллеһыгар научнай-практическай конференцияҕа устудьуоннары сэргэ эргиэн, кооперация үлэһиттэрэ, бэтэрээннэрэ кыттыахтара уонна кооперация сайдар тосхолун тула кэпсэтиэхтэрэ.
Иккис күн үөрүүлээх мунньах Суорун Омоллоон аатынан Опера уонна балет тыйаатырыгар буолуоҕа. Үөрүүлээх тэрээһиҥҥэ Арассыыйа киин сойууһун салайааччылара, атын эрэгийиэннэртэн бэрэстэбиитэллэр, бэтэрээннэр, үлэһиттэр кэлэн кыттыахтара.
— Үбүлүөйү көрсө биир үөрүүлээх сонуммут диэн, бэйэбит “Холбоспут” дьиэтин иһигэр мусуой арыллыыта буолар. Сүрдээх интэриэһинэй ис хоһоонноох мусуой буолуо диэн эрэнэбит. Былыргы элбэх экспонаттары туруордубут. Туох-туох суоҕуй? Былыргы харчылар, суоттар, маҕаһыыннарга эҥин туттуллубут маллар уо.д.а. Мусуой арылларыгар СӨ Култуураҕа министиэристибэтэ уонна Ярославскай аатынан мусуой салалтата биһиги көрдөһүүбүтүн ылынан, урут мусуойга туттарыллыбыт сэдэх маллары төттөрү биэрбиттэрин иһин махталбытын биллэрэбит, — диэтэ сэбиэт бэрэссэдээтэлэ Петр Николаевич.
Күн бүгүн “Холбос” 24 тэрилтэлээх, 16 улууһу аһынан-үөлүнэн хааччыйаллар. Тэрилтэ урут уруккуттан социальнай хайысхалаах үлэни толорор. Ол курдук, өрөспүүбүлүкэбит үгүс кытыы нэһилиэктэрин бу тэрилтэ хааччыйар. Бүлүү, Үөһээ Бүлүү, Ньурба, Таатта, Чурапчы, Өлүөхүмэ, Кэбээйи кытыы, куһаҕан суоллаах-иистээх нэһилиэктэригэр үлэлиир. Билигин урбаанньыттары кытта күрэстэһии күүстээх кэмигэр тыа сирин олоҕо-дьаһаҕа чэпчииригэр кыах баарынан үлэлии сылдьар буолан, нэһилиэнньэ махталын ылаллар.
Үбүлүөй чэрчитинэн Арассыыйа киин сойууһа, СӨ Бырабыыталыстыбата уонна “Холбос” сойууһа үс өрүттээх сөбүлэһиигэ илии баттаһыахтара.
Женни Стрюкова, «Саха сирэ» хаһыат, edersaas.ru