Муус устар 5-6 күннэригэр Таатта улууһун Игидэй нэһилиэгэр улуус оскуолаларын үөрэнээччилэригэр уонна улахан дьоӊӊо хайыһарга күрэхтэһии буолан ааста. Бу тэрээһини улуус хайыһарга спордун федерацията, Игидэй нэһилиэгин дьаһалтата уонна олохтоох оскуола коллектива иилэн-саҕалаан ыыттылар.
Күрэхтэһии арыллыытыгар Таатта улууһунааҕы хайыһар спордун федерациятын бэрэссэдээтэлэ Валентин Охотин уонна Игидэй нэһилиэгин баһылыга Руслан Захаров кыттыыны ыллылар. Күрэхтэһии кылаабынай судьуйатынан оскуола физкултуураҕа учуутала Егор Захаров үлэлээтэ. Аныгы технологиялар олоххо киирэн иһэллэр. Быйылгы күрэхтэһии сонун көстүүтүнэн электроннай «ЧИП» диэни туттуу буолла. Ол аата хайыһардьыт атаҕар «чип» кэтэрдэн күрэхтэһиннэрдилэр. Хаһан стартаабытын, фиништээбитин компьютер нөҥүө биллэрэр. Маннык «ЧИП» Алданнааҕы хайыһар баазатыгар эмиэ туттуллубут эбит.
Бастакы күн биирдиилээн сүүрүү буолла. Ол курдук, түмүктэр:
— кыра кыргыттарга, 1 км:
1. Ордахова Виолетта, Дэбдиргэ оскуолата;
2. Лопатина Арианна, Дэбдиргэ оскуолата;
3. Рахлеева Маша, Уолба оскуолата.
— кыра уолаттарга, 1 км:
1. Баннов Олег, Дэбдиргэ оскуолата;
2. Винокуров Коля, Уус Таатта оскуолата;
3. Лопатин Илья, Дэбдиргэ оскуолата.
— кыра кыргыттарга, 2 км:
1. Антоева Ганна, Дэбдиргэ оскуолата;
2. Турнина Нарияна, Дэбдиргэ оскуолата;
3. Находкина Туйаара, Уус Таатта оскуолата.
— кыргыттарга, 3 км:
1. Бочурова Сайыына, Уолба оскуолата;
2. Баишева Марина, Уус Таатта оскуолата;
3. Захарова Айгуль, Дэбдиргэ оскуолата.
— уолаттарга, 6 км:
1. Захаров Эдуард, Дэбдиргэ оскуолата;
2. Лопатин Семен, Дэбдиргэ оскуолата;
3. Капитонов Слава, Уолба оскуолата.
— кыргыттарга, 3 км:
1.Неустроева Лиана, Уус Таатта оскуолата;
2. Жулева Сайаана, Дэбдиргэ оскуолата;
3. Никонова Нарыйаана, Уолба оскуолата.
— уолаттарга, 6 км:
1. Рахлеев Денис, Уолба оскуолата;
2. Васильев Айаал, Дэбдиргэ оскуолата;
3. Захаров Павел, Дэбдиргэ оскуолата.
Иккис күн эстафетаҕа Игидэй орто оскуолатын хайыһардьыт оҕолоро эрэллээхтик бастаатылар, тренердэрэ — Софрон Оросин. Иккис миэстэҕэ Уус Таатта хайыһардьыттара адьас кыранан хааллылар, тренердэрэ, физкултуура учуутала —Алитет Кочнев, үһүс миэстэҕэ Уолба орто оскуолата таҕыста.
Күрэхтэһиини Петр Петрович Ермолаев төрөппүт уола, Сергей Петрович Ермолаев олус интэриэһинэйдик сырдатта. Кини өрөспүүбүлүкэҕэ киэӊник биллэр комментатор, аҕатын суохтаппакка комментатордаата. Оттон кини кэргэнэ, олохтоох оскуола нуучча тылын учуутала Мария Павловна Ермолаева күрэхтэһии арыллыытын ыытта.
Саха тылын учуутала, СӨ үөрэҕириитин туйгуна Варвара Ефимова социальнай ситимӊэ маннык суруйар: «Ханнык да тэрээһин баазаттан уонна хайыһар суолуттан саҕаланар. Ол курдук, Дэбдиргэҕэ сыллата хайыһар баазата тупсан иһэрин бэлиэтиир тоҕоостоох. Бу илиини араарбакка үлэлиир, нэһилиэк, улуус, бырабыыталыстыба хайа да отчуотугар сылайары билбэккэ сындалҕаннаахтык туруорсар Софрон Оросин үтүөтэ буолар. Быйыл ханна да суох хайыһар манеһын туттаран үлэҕэ киллэртэрдэ. Оҕолор дьарыктарыгар төһүү күүс буолла. Хайыһар баазатыгар оҕолор сылаас таҥаһы кэтэн дьарыктаналларыгар, иттэллэригэр, сынньаналларыгар анаан икки этээстээх дьиэ тутуллубута. Маны барытын оскуолаҕа дириэктэрдээн олорор кэмигэр Виктор Лопатин сүрүннээн үлэҕэ киллэрбитэ. Хайыһар күрэҕэр саамай улахан оруолу суолун оноруута (дорожка) быһаарар, Дэбдиргэ трассата сыллата олус үчүгэйдик оӊоһуллан тупсан иһэр. Манна сүрүн үлэһиттэринэн оскуола тырахтарыыһа Гавриил Жулев уонна сыллата илиитин араарбакка баҕа өттүнэн көмөлөһөр бураан техникалаах Алдан Кутанатыттан төрүттээх Руслан Кузьмин буолаллар».
Улахан дьоӊӊо түмүк маннык таҕыста:
— эр дьоҥҥо, 6 км:
1. Рахлеев Амос, Уолба;
2. Лопатин Андрей, Дэбдиргэ;
3. Петров Никифор, Ытык Күөл.
— дьахталларга, 3 км:
1. Оросина Чэмэлиинэ, Дэбдиргэ;
2. Жулева Ньургуйаана, Дэбдиргэ;
3. Андросова Сардаана, Ытык Күөл.
— бэтэрээн дьахталларга, 2 км:
1. Тихонова Лена, Ытык Күөл;
2. Варламова Татьяна, Чымнаайы;
3. Жулева Ньургустаана, Дэбдиргэ.
— бэтэрээн эр дьоҥҥо:
1. Оросин Софрон, Дэбдиргэ;
2. Тарасенко Василий, Ытык Күөл;
3. Алексеев Роман, Кыйы.
Нэһилиэктэр икки ардыларынааҕы комплекснай спартакиада түмүгэ маннык буолла: Игидэй- 1 миэстэ, Ытык Күөл-2 миэстэ, Чымнаайы-3 миэстэ.
Игидэй нэһилиэгин дьаһалтатын баһылыга Руслан Захаров күрэхтэһии кэмигэр улуус дьаһалтатыгар, улуус хайыһарга федерациятыгар, оскуола, КСК коллективтарыгар, тэрийсибит, кыттыбыт нэһилиэк хас биирдии олохтооҕор барҕа махтал тылларын эттэ. Дэбдиргэ түмсүүлээх, ханнык баҕарар көрүӊӊэ өрүү инники күөӊӊэ буоллун, норуот күүһэ — көмүөл күүһэ диэн эттэ.
Таатта Игидэйиттэн
«Саха сирэ» хаһыакка, edersaas.ru саайтка анаан
педагог-библиотекарь Гизелла Попова.