Уһук Илин уонна Арктика сайдыытын пуондата (ФРДВ) Саха сиригэр уонна Еврейскэй автномнай уобалас быраастарыгар анаан бэйэни харыстанар малы ыытта. Бу туһунан РФ Бэрэсидьиэнин Уһук Илин федеральнай уокурукка боломуочуйалаах бэрэстэбиитэлистибэтин пресс-сулууспата иһитиннэрэр.
Тустаах мэдиссиинискэй сириэстибэлэр Арассыыйа Бэрэсидьиэнин Уһун Илин федеральнай уокуругар боломуочуйалаах бэрэстэбиитэлэ Юрий Трутнев сорудаҕынан уонна РФ Уһук Илин уонна Арктика сайдыытын министиэристибэтин көмөтүнэн ыытылынна.
«Суһаллык быраастары уонна медперсоналы тустаах малынан хааччыйыахха наада. Дьон олоҕун быыһыыр быраастар доруобай буолуохтарын наада. Эбии мэдиссинискэй сириэстибэлэр уонна тэриллэр бүддьүөтү таһынан үптэн атыылаһыллаллар. Маннык көмөнү Уһук Илин түөрт эрэгийиэнэ ылла — Забайкальскай кыраай, Бурятия, Саха сирэ уонна Еврейскэй автономнай уобалас», — диэн Юрий Трутнев бэлиэтиир.
Ыам ыйын устата Саха сиригэр 8,1 тыһыынча комбинезон, 29,2 тыһыынча респиратор, 11,8 тыһыынча ачыкы, 16,2 тыһыынча паара бэрчээккэ кэлиэхтээх. Билигин номнуо 1440 көстүүм Нерюнгрига оройуонугар кэлбитэ, онно түмэн баран, салгыы өрөспүүбүлүкэ балыыһаларынан тарҕатыахтара.
Маннык көмөнү — 240 көстүүмү Еврейскэй автономнай уобалас быраастарыгар тиэртилэр. Ыам ыйын устата 5,7 тыһыынча респиратор, 2,5 тыһыынча ачыкы, 3,2 тыһыынча паара бэрчээккэ, 1,6 тыһыынча комбинезон тиийиэхтээх.
edersaas.ru
Хаартыска — UssurMedia.