Сахабыт сиригэр бэйэлэригэр эрэллээх, сайдыан баҕарар, үөрэххэ-билиигэ тардыһар оҕо элбэх. Кинилэргэ анаан бу күннэргэ «Ленскай кыраай» форумҥа оскуола оҕолоругар аналлаах үһүс төгүлүн ыытыллар «Будущие интеллектуальные лидеры» диэн форум үрдүк таһымнаахтык буолан ааста. Бу форумҥа оҕолор араас улуустартан кэлэн үөрэнэн, тус санааларын-оноолорун үллэстэн, лидер быһыытынан сайдан, бэйэ санаатын сайа этэр, эппиэтинэстээх буоларга үөрэнэн тарҕастылар.
Барыта 70-ча үөрэнээччи уонна 10 эдэр кэрэспэдьиэн талыллан үлэлээтилэр. Оҕолор бары оскуола, гимназия саамай актыбыыс, өйдөөх, инньикигэ эрэллээх, бэйэлэрэ сыаллаах-соруктаах дьон буолан биэрдилэр. Үс күн устата бэйэтин кыаҕын, күүһүн, тобуллаҕас толкуйун, өркөн өйүн көрдөрбүт оҕолор, сайын ыытыллар норуоттар икки ардыларынааҕы өй оонньуутугар кыттар үрдүк чиэскэ тигистилэр.
Форум устата араас маастар кылаастар, профессордар, СР үөрэҕин уонна наукатын миниистирин кытта көрсүһүүлэр, интеллектуальнай оонньуулар, спортивнай күрэхтэһиилэр буоллулар. Ону таһынан араас үөрэх кыһаларын устудьуоннарын, выпускниктарын кытта сирэй кэпсэтиилэр, лекциялар ыытылыннылар. Оҕолор күнүн аайы саҥаны, сонуну биллилэр-көрдүлэр.
Киэһээҥҥи өттүгэр үгүс элбэх оҕолору аралдьытар биэчэрдэр, тэрээһиннэр буоланнар, үөрэх таһынан иллэҥ кэмнэрин сынньанан, бииргэ оонньоон, бэйэ-бэйэлэрин кытта билсэн наһаа астынан тарҕастылар.
— Үтүө күнүнэн, бэйэҕитин билиһиннэриэххит дуо?
— Дорооболорун, мин аатым Сардаана Гермогенова, Горнай улууһун Бэрдьигэстээх орто оскуолатын 11-с кылааһын үөрэнээччитэбин.
— Сардаана, эн иллэҥ кэмҥэр тугунан дьарыктанаҕыный?
— Мин иллэҥ кэммэр үнкүлүүрбүн, ыллыырбын, кыыс буоларым быһыытынан иистэнэрбин туохтааҕар да ордоробун.
— Эйигин үҥкүүнэн дьарыктанаргар туох интириэһиргэппитэй?
— Мин интернет ситимҥэ араас видеолары, улуу үҥкүүһүттэри көрөбүн, кинилэртэн холобур ылабын. Үҥкүүнэн үлүһүйэр атын оҕолору кытта алтыһабын, билсэбин. Хайдах эрэ оҕолорум үрдүккэ, сырдыкка кынаттыыллар.
— Эн саамай баҕарар баҕа санааҥ тугуй?
— Билиҥҥи турукпунан эттэххэ, мин баҕа санаам диэн оскуолабын ситиһиилээхтик бүтэрэн, биир кэлим эксээмэннэрбин үрдүк баалга суруйан, үрдүк үөрэх кыһатыгар туттарсан киирээһин буолар.
— Эн ханна уонна ханнык үөрэххэ киириэххин баҕараҕыный?
— Россия үрдүнэн саамай олоххо сөптөөх куорат Санкт-Петербург дии саныыбын. Кыра оҕо эрдэхпиттэн бу куорат туһунан түүлбэр эрэ түһээн көрбөтөҕүм. Мин Санкт-Петербургка прикладной информатика үөрэҕэр туттарсыахпын баҕарабын.
— Эн санааҕар аныгы киһи уобараһа хайдах буолуохтааҕый?
— Мин санаабар, сүүрбэ биирис үйэ ыччата өй-санаа эрэ өттүнэн күүстээх буолбакка, спортка эмиэ сыстаҕас, ситиһиилээх, тус бэйэтигэр эрэллээх уонна инньики сыаллаах буолуохтаах.
— Бу форумҥа эн туох сыаллаах кэлбиккиний?
-Бу форумҥа мин саҥаны билээри-көрөөрү, атын оҕолору кытта билсээри кэлбитим.
— Сардаана, эн туох улахан ситиһиилэрдээххиний?
— Мин былырыын саас Салихарга ыытыллыбыт норуоттар икки ардыларынааҕы экологическай форумҥа баран ситиһиилээхтик кыттан кэлбитим. Онуоха таптыыр оскуолам учууталлара күүс-уох өйөбүл буолбуттара туохтааҕар да күндү.
— Сардаана, биһиги кылгас ыйытыктарбытыгар эппиэттээбитиҥ иһин махтал. Инникитин үрдүк ситиһиилэри, кыайыыны-хотууну эрэ баҕарабыт.
Лена Ефремова, Н.Д. Субуруусскай аатынан оскуола үөрэнээччитэ.