Былырыын ахсынньыга 5 сыллаах үбүлүөйүн бэлиэтээбит “Якутия” Технопарк» үлэтин сүрүн соруга — бизнес эйгэтигэр бэйэлэрин суолларын саҥа тэлэн эрэр урбаанньыттарга өйөбүл оҥоруу. Елена ПОТОЦКАЯ “Саха сирэ” хаһыат, https://edersaas.ru
«Якутия» Технопарк бүгүҥҥү үлэтин ис хоһоонун тэрилтэ пресс-сэкирэтээрэ Анастасия Данилова-Дарбасова билиһиннэрэр.
Тэрилтэҕэ — кэскиллээх саҕах
Араас толкуйдаах, идеялаах эдэр дьон манна кэлэн бырайыактарын көмүскээн, кынаттанан тахсаллар.
«Якутия» Технопарк» автономнай тэрилтэ салайааччыта Анатолий Семенов, бүгүҥҥү күҥҥэ тэрилтэ биэс сыллаах үбүлүөйүгэр 89 резиденнээҕин, 454 үлэ миэстэтэ тахсан, миллиардынан суумалаах үлэ оҥоһуллубутун туһунан киэн тутта кэпсээбитэ. Аны 100 кэскиллээх стартап-бырайыак көмүскэнээри турар. 5 резидент Москватааҕы бизнесменнэр «Сколково» пуондаларын резиденинэн буолар.
Биэс сыл устата «Якутия» Технопарк» «Саха Липснеле», «Бигэ», «Эгопласт», «Хоту-бакт», «Саханефтебиосорб» курдук бизнес эйгэтигэр номнуо ааттаах-суоллаах тэрилтэлэри такайан таһаарда. Тэрилтэ сүрүн ситиһиитэ – федеральнай таһымҥа биһирэнэн, урутаан социальнай-экономическай сайдыы территорията статустаммыт «Кангалассы» индустриальнай паарка буолар. Кэрэхсэбиллээҕэ, технопаарка алта выпускнига “Кангалассы” индустриальнай паарка сиригэр-уотугар собуот тутта. Сотору кэминэн бу тэрилтэлэр тигинэччи үлэлээн барыахтара.
«Якутия» Технопарк» 2013 с. Нерюнгри к. филиалын аспыта. Бу Саха сирин соҕуруу промышленнай оройуонугар саҥа технологияны уонна научнай чинчийиилэри олоххо киллэриигэ биир тарбахха баттанар тэрилтэнэн буолар.
Сүүмэрдээһиҥҥэ — кэскиллээх бырайыактар
Тохсунньу 26 күнүгэр Дьокуускайга регионнааҕы OIST-консалтинг практическай сессията ыытыллар. Онно Россиятааҕы венчурнай хампаанньа научнай түмсүүлэри, үрдүк үөрэх кыһаларын исписэлиистэрин уонна инвестордары түмүөҕэ. Манна кэскиллээх, ураты ис хоһоонноох аныгы технологиялар ирдэбиллэригэр эппиэттиир бырайыактары ырытыы буолуоҕа. Үөрэтии бырагырааматынан ыытыллар тэрээһиҥҥэ ааттаах-суоллаах бизнес-тренердэр, экспертэр, урбаанньыттар, учуонайдар Саха сирин рационализатордарын бырайыактарын сүүмэрдиэхтэрэ. Талыллыбыт үлэлэр тохсунньу 30-31 күннэригэр Арассыыйа уонна холбоһуктаах дойдулар 14 куораттарыгар (Дьокуускай, Хабаровскай, Санкт-Петербург, Екатеринбург, Ереван, Баку, Алматы уо.д.а.) “Open Innovations Startup Tour-2017” диэн норуоттар икки ардыларынааҕы сессияларга кыттыыны ылыахтара.
Ханнык бизнес-тренердэр кэлиэхтэрэй?
Саха сирин урбаанньыттарын үөрэтиигэ уонна сүбэлииргэ “АйТи” инвестиция бөлөҕүн салайааччыта, «Кнопка Жизни» интернет-көҕүлээһин пуондатын салайааччыларын сэбиэтин чилиэнэ Дмитрий ТОРШИН кыттыыны ылыаҕа. 30 научнай үлэ ааптара, инвестордары бэйэҕэ тардарга улахан уопуттаах, араатар быһыытынан ураты истииллээх бизнес-тренер Гайк АСРИЯН эмиэ кэлэргэ сөбүлэҥин биэрдэ.
Онон, түгэнинэн туһанан, инвестицияны бэйэҕэ тардыан баҕалаах анал бырайыактары толкуйдуу сылдьар дьон бу олус наадалаах үөрэххэ кэлэн босхо кыттыҥ диэн ыҥырабыт. Тэрээһин ыытыллар сирэ: Дьокуускай к. «Якутия» Технопарк», Дзержинскэй уул., 76.
https://loga-group.timepad.ru/event/426255/ аадырыска регистрацияланаҕыт.
Елена ПОТОЦКАЯ “Саха сирэ” хаһыат, https://edersaas.ru