Култуура Уопсастыба

Кэскиллээҕи кэрэһилээн

«Кэскиллээҕи кэрэһилээн» диэн бэрт бүөмчү ааттаах кинигэ күн сирин көрбүт. Кинигэ 351 страницалаах элбэх хаартыскалардаах, халыҥ тастаах “Дани-Алмас” хампаанньа типографиятыгар 150 экземплярынан бэчээттэммит.

Кинигэҕэ киирбэтэх хаартыскалары, видеолары куйаар ситиминэн киирэн көрөр гына оҥоһуллубут.  РФ Норуот үөрэҕириитин туйгуна, СӨ култууратын туйгуна, «Таатта улууһун сайдыытыгар кылаатын иһин”, “Музей дьыалата сайдыытыгар кылаатын иһин” бэлиэ хаһаайына, Таатта улууһун Дьүлэй нэһилиэгин бочуоттаах олохтооҕо, үгүс көлүөнэ ыччат кутун туппут учуутал, настаабынньык, кыраайы үөрэтээччи Егор Иванович Сыромятников туһунан кэргэнин, оҕолорун, чугас аймах-билэ дьоннорун, алтыһан ааспыт бар дьонун истиҥ ахтыылара бэчээттэммиттэр.

12 түһүмэхтэн турар истиҥ, сырдык ис хоһоонноох кинигэни  кэргэнэ Елизавета Ивановна, оҕолоро Иван Егорович, Октябрина Егоровна Сыромятниковтар, Айталина Егоровна Унарова хомуйан оҥорбуттар. Егор Иванович Сыромятников былыргы үһүйээннэри, норуот тылынан уус-уран айымньытын олоҥхону, өс хоһооннорун билэрэ. Туора күөл орто оскуолатыгар оҕону иитиигэ айымньылаахтык үлэлээбитэ. Тыа хаһаайыстыбатын техникатын музейын тэрийиигэ үгүс сыратын-сылбатын уурбута. Арассыыйаҕа, өрөспүүбүлүкэҕэ киэҥник биллибит бастыҥ үлэлээх «Манай» үлэ-сынньалаҥ лааҕырын тэрийсибитэ, настаабынньыгынан таһаарыылаахтык үлэлээбитэ. Хотууру, кыраабылы. мас кыдамалары нарылаан, наардаан араас былыргы номохтору кэпсии-ипсии олорон оҥороро көрүөхтэн дьикти үчүгэй, ураты дьүрүскэн буолара. Күөлгэ балыктары үөскэтии үөрүйэхтэрин олохтообут кини. Маны таһынан народнай театр артыыһа, режиссера. Аата-ахсаана биллибэт дьон ыал буолар уруу киэһээлэрин ылбаҕай тылынан ыпсаран, сыа-сым курдук сааһылаан ыытар тамада бэрдэ.

Кинигэҕэ Егор Иванович кэрэхсэбиллээх ыстатыйалара киирбиттэр, күн сириттэн күрэниэн аҕай иннинэ суруйбут “Андаатар алдьатыыта” ыстатыйата, суруйбут сценкалара, монологтара, наҕараадалара бэчээттэммиттэр. Суруйааччы Реас Кулаковскай “Дьөгүөр хомойор” хоһооно, Егор Иванович туһунан Герасим Бэстиинэп-Дьулурҕа, «Эдэр коммунист”, “Социалистическая Якутия”, “ Саха Сирэ”, “Таатта” хаһыаттарга, Российское народное образование сурунаалга бэчээттэмит ыстатыйалар киирбиттэр. Кинигэни ылан ааҕыҥ, сэргээҥ.

«Саха сирэ» хаһыат, edersaas.ru  саайтка анаан Дмитрий Осипов

1
1